ЕУ без јасна алтернатива за обезбедување евтини енергенти за стопанството и граѓаните
Договорот што им дозволува на државите од Централна Европа да купуваат руски гас преку Украина наскоро ќе заврши, изјави рускиот претседател Владимир Путин во четвртокот, иако лидерите на Европската Унија, пријателски настроени кон Кремљ, се обидуваа да обезбедат нивен континуиран пристап до евтино гориво.
Говорејќи на своето традиционално годишно обраќање, рускиот лидер рече дека ќе биде дозволено договорот за транзит да истече на крајот на годинава, без јасна алтернатива на повидок.
– Овој договор повеќе нема да постои, тоа е многу јасно – рече Путин.
Украина одби директно повторно да преговара за договорот и наместо тоа понуди сопствено домашно производство на гас како алтернатива за своите соседи.
Истовремено, на прес-конференција во Брисел во четвртокот, украинскиот претседател Володимир Зеленски кажа дека „нема да го продолжиме транзитот на руски гас“ надвор од условите на договорот.
Долгорочниот договор, потпишан во 2019 година, му овозможи на рускиот државен енергетски гигант „Газпром“ да пумпа природен гас низ огромната украинска мрежа на гасоводи до клиентите во ЕУ.
Русија ги прекина испораките на земји како Германија и Полска по почнувањето на војната во Украина во февруари 2022 година. Сепак, оттогаш, неколку земји членки на ЕУ, вклучувајќи ги и Словачка, Унгарија и Австрија, продолжија да купуваат руски гас преку оваа маршрута, и покрај посветеноста на ЕУ да се прекине зависноста од Москва до 2027 година.
Словачкиот премиер Роберт Фицо јавно повика на договор за продолжување на практиката. Во меѓувреме, унгарскиот премиер Виктор Орбан ја посети Бугарија, каде што се надева дека ќе постигне договор за да обезбеди континуиран пристап до резервите.
Р.С.
