Интегрален приод во кој се осветлуваат трите форми на единственото идентитетско име на Македонците

Книгата е компилација од над илјада сведоштва, пронајдени низ автентични историски извори, во периодот од 2.000 години, во кои на експлицитен начин се спомнува името „Македонци“ на просторот на Македонија. Трудот има интегрален, сеопфатен научен приод за тој голем период во која идентитетското име на Македонците се среќава во три форми: територијална, етно-историска и национална…

Книгата „Македонци, милениумски сведоштва за идентитетското име“ промовирана во Сплит, Хрватска

Доктор Бранислав Светозаревиќ, историчар и автор на книгата „МАКЕ­ДОНЦИ, милениумски сведоштва за идентитетското име“, со својот сопатник Ацо Крстески, претседател за Европа на Светскиот македонски конгрес (СМК), на својата дваесетдневна турнеја посети шест европски држави, Австрија, Германија, Швајцарија, Италија, Словенија и Хрват­ска, презентирајќи ја книгата пред маке­донската дијаспора. Во повеќето градови во Европа што ги посетија наидоа на многу голем интерес меѓу Македонците за оваа интегрална студија за македон­ското етнич­ко име.
Книгата е компилација од над илјада сведоштва пронајдени низ автентични историски извори, во периодот од 2.000 години, во кои на експлицитен начин се спомнува името „Македонци“ на просто­рот на Македонија. Низ тој голем период идентитетското име на Македон­ците се среќава во три форми: терито­ријална, етноисториска и нацио­нална. Покрај автентичните сведоштва, авторот на ова грандиозно дело дава и анализа на секој од периодите низ кој поминувал процесот на користењето на идентитет­ското име.

Авторот Светозаревиќ за потребите на оваа книга се консултирал со 14 доктори на науки и специјалисти од различни периоди и прашања на историјата.
Македонците во Сплит ја прегрнаа книгата, притоа покажувајќи извонредно големо интересирање за многу делови од македонската историја, кои за нив биле недоразјаснети. Во една срдечна и топла атмосфера поминуваа постпрезен­тативните моменти исполнети со многу прашања од историјата на кои авторот даваше одговори исполнети со автен­тични историски примери, кои ги појас­нуваа и дополнуваа одговорите.
Во текот на турнејата беа донирани примероци на книгата во македонска и англиска верзија на универзитетите во Виена, Хајделберг и Франкфурт, како и во седиштето на Обединетите нации во Женева.
– Во една пријатна атмосфера, каде што бевме почестени со присуство на двајца хрватски професори, господин Јосип Милат и господин Стјепан Лапенда, заврши и последната во низата презентации на европската турнеја на книгата „МАКЕДОНЦИ, милениумски сведоштва за идентитетското име“ со музичкиот состав „Стоби“ од Сплит. Покрај тоа имавме и интервју во Хрватската радио-телевизија, оддел на Хрватското радио Сплит, кај репортерката, госпоѓа Миранда Храбар – изјави Ацо Крстески.

Ангел Митревски, специјално за „Нова Македонија“ од Хрватска