Три лица завршија во болница во Загреб, а едно во Риека, поради сомневање за труење со газирани пијалаци.
Хрватскиот министер за здравство, Вили Берош, утринава за телевизијата Н1 изјави дека денеска има малку повеќе пациенти од труење со газирани пијалаци, пренесуваат хрватските медиуми.
-Има уште неколку, сите се полесно повредени, кај многумина прашање е дали се работи за хемиска повреда или за психогена реакција или за некоја друга патолошка состојба. Во моментот ситуацијата е под контрола – рече тој.
Берош рече дека мора да се биде внимателен, но дека нема потреба од паника.
Случајот со четвртото хоспитализирано лице во Хрватска, синоќа, за „Нова“ го потврди Рајко Остојиќ, специјалист по гастроентерологија и хепатологија и претставник на Одделот за гастроентерологија при КБЦ „Загреб“.
-Околу 20 часот примивме пациент. Се работи за млад човек, кој е во клинички добра состојба, лекувањето е во тек и засега изгледа клинички добро – рече Остојиќ додавајќи дека постои сомнеж оти тоа е труење со пијалак, но се чекаат дополнителни анализи.
Хрватскиот министер за здравство Берош им препорача на граѓаните да пијат вода.
