Премиерот Димитар Ковачевски денеска се сретна со новиот амбасадор на Обединетото Кралство на Велика Британија и Северна Ирска во нашата држава Метју Лосон .
На состанокот било потврдено големото пријателство помеѓу Македонија и Обединетото Кралство и била потенцирана заедничката определба за унапредување на соработката во економијата, во одбраната – како партнерски држави во НАТО, во борбата против криминалот и корупцијата и е најавена поддршка на натамошните реформски процеси во државава.
На средбата исто така биле упатени честитки за напредокот на нашата држава во евроинтеграциите и почетокот на преговорите со ЕУ, преку постигнатите мудри решенија во предлогот на француското претседателство со Советот на ЕУ. При тоа е пренесена цврста поддршка од Обединетото Кралство за реализација на стратешките цели на Република С. Македонија, како што е полноправно членство во Европската Унија, по членството во НАТО. Изразена била и поддршка на политиките што водат кон развој на државата, преку инклузивност и соработка, во земјава и во регионот.
На средбата било истакнато почитувањето од Обединетото Кралство на македонскиот јазик и на развојот на македонската култура.
Исто така, заеднички било констатирано дека политиките на добрососедство даваат резултати во перспективите на земјава и на целиот регион. Во таа насока било нагласено и значењето на иницијативата Отворен Балкан.
-Владата и јас како премиер сме насочени кон обезбедување подобар живот за граѓаните, преку примена на европските вредности во државата. Определени сме кон владеење на правото и независност на правосудниот систем. Водиме принципиелни политики на добрососедство со целосна посветеност кон националните и идентитетските определби. Во надворешната политика сме поставени стопроцентно на линија на политиките на ЕУ. И, очекуваме дека сите политички субјекти во земјава ќе ги надминат партиските интереси, со цел целосна реализација на втората стратешка цел – членството во ЕУ, што е едиствениот исправен пат и од којшто повеќе нема назад – рече премиерот Ковачевски.
