Социјалната мрежа Твитер ги забрани рекламите што го промовираат оспорувањето на климатските промени. Овој потег на Твитер е насочен против рекламирање што ја заведува јавноста и не е во согласност со научниот консензус за климатските промени, па платформата ја забрани таквата содржина и ја означи како несоодветна.
– Сметаме дека негирањето не треба да се монетизира на Твитер и дека погрешните реклами не треба да го оттргнуваат вниманието од важните разговори за климатските промени. Јасно ни е дека погрешните информации за климатските промени можат негативно да влијаат на напорите за заштита на планетата – соопштија официјалните лица на Твитер.
Тие исто така додадоа дека ќе се направи процена дали рекламите за климатски промени ги прекршуваат правилата врз основа на извештаи од авторитетни извори. Твитер ќе објави повеќе детали во наредните месеци за неговата работа на обезбедување веродостоен и авторитетен контекст на разговорите за климатските промени.
Овој потег се заснова на некои други мерки што Твитер ги презема кога станува збор за климатските промени. До крајот на 2022 година, Твитер сака да се префрли на користење извори на енергија без јаглерод во своите центри. Тој, исто така, се приклучи на климатскиот пакт на Европската Унија претходно оваа година, а посветен е и на транзицијата кон обновлива електрична енергија и инвестира во технологијата за отстранување на јаглеродот.
