Во неколку продолженија ќе објавиме стихови од писателот Саво Костадиновски, кој ги напишал за својата татковина Македонија. Тој ги опеал планините, реките, езерата, градовите нејзини, па преку овие стихови ќе можете и сами да проверите колку знаете за земјата во која сте родени
Скопска Црна Гора
Само што ќе станам,
по ноќната мора,
ми одмора очи –
Скопска Црна Гора.
Таа е преполна
со падинки благи,
сите дрвја, сенки,
многу ми се драги.
Само што ќе станам,
уште в рана зора,
сакам да сум горе, на врвот
на Скопска Црна Гора!
Китка
Има става зелена,
згора уште витка,
нашата убавица –
планината Китка!
По китните шуми –
шуми листот зелен,
кротко пасе срна,
пасе мирен елен.
Рибар некој страсен,
во сништа што плови,
се скрил под сенка –
в река риби лови!
Водно
Еве нешто убаво,
еве нешто згодно,
еве планина-паркче,
еве ни го Водно!
Еве безброј извори,
еве шума со костени,
Водно ви нуди да бидете
со сѐ нагостени!
Еве нешто убаво,
нешто мило, згодно,
еве ни го пред нас –
за прошетки Водно!
Бигла
Покрај Баба се вденала
како да е игла,
цела чиста, шумовита –
планината Бигла.
Скришум ѕирка кон Демир Хисар,
кон Белче и Слепче,
кон другари-овчарчиња,
кај што јадат лепче.
Им нуди води, сенки,
ладни, ширни, дабовити,
само песни да запеат –
песни мили, гласовити!
Манговица
Манго бил ќумурџија,
правел јаглен дрвен,
по тоа бил прочуен –
како мајстор врвен!
Но што вреди кога
пиел многу сливовица
и за ништо тој ја тепал
жена си Манговица!
Манговица в шума,
побегнала од ранина,
и за да му се скрие –
постанала планина!
Сега Манго не пие,
се откажа од сливовица:
везден прави ќумур –
горе на Манговица!
За авторот
Саво Костадиновски е македонски и германски поет, раскажувач, патописец, публицист, писател за деца и возрасни, препејувач.
Роден е во 1950 г., во с. Горно Ботуше, Македонски Брод. По катастрофалниот земјотрес во Скопје, во 1963 година, живее на повеќе места на просторот на бивша Југославија. Од 1971 година живее и работи во Келн, Германија. Завршил средно техничко училиште во Белград и трет степен за технички инженер во Келн.
Добитник е на наградата „Иселеничка грамота“ од Матица на иселениците на Македонија, како и на награда од Сојузот на германските писатели.
Негови творби се објавувани во списанија за деца и возрасни во Македонија, а преведуван е на српски, хрватски, германски и на романски јазик. Застапен е во антологии.
Меѓу другите, автор е на делата: „Лето во родниот крај“, „Кафез без птици“, „Децата на светот“, „Македонски знаменитости“, „Со татковината“, „Трите века“, биографски хронолошки роман за возрасни, книгата „На Македонија со љубов“ и многу други.
Член е на Друштвото на писателите на Македонија од 1989 година, а на Сојузот на писателите на Германија од 1993 година.
