Националната мрежа против насилство врз жени и семејно насилство во партнерство со Клубот на пратенички во Собранието, организира панел-дискусија на тема „Предлог модел за реинтеграција и рехабилитација на жени жртви на семејно насилство“ , која ќе се одржи во хотел „Холидеј ин“.
Воведно обраќање ќе имаат Елена Димушевска, извршна директорка на Националната мрежа против насилство врз жени и семејно насилство и Ѓулумсер Касапи, претседателка на Клубот на пратенички во Собранието на Репупблика Северна Македонија.
Панелистки што ќе имаат свои обраќања се: Снежана Калеска Ванчева – пратеничка од СДСМ, Благица Ласовска – пратеничка од ВМРО-ДПМНЕ, Јулијана Николова – пратеничка од ЛДП и Маја Морачанин – пратеничка од ДОМ.
Денеска се одбележува Меѓународниот ден против насилство врз жените кој годинава се одбележува под мотото „Обојте го светот портокалово: Генерацијата еднаквост против силувањето”.
Како и претходно и годинава Меѓународниот ден ќе го означи отпочнувањето на 16 дена активизам што ќе заврши на 10 декември 2019 година, што е Меѓународен ден на човековите права.
Меѓународниот ден за борба против насилството врз жените е востановен на првиот состанок на феминистките од Јужна Америка и Кариби (Feminist Encuentro) во 1981 година во Богота, кога жените првпат отворено зборувале за семејното насилство, силувањето и сексуалното злоупотребување, како и насилство кое жените го трпат под режимите, вклучувајќи тортура и насилство.
Во 1999 година, ОН со резолуцијата 54/134 официјално го потврдиле 25 ноември како Меѓународен ден на борбата против насилство врз жените.
Овој ден е одбран како сеќавање на сестрите Мирабел – Патрија, Минерва и Марија Тереса, кои брутално ги убил диктаторот Рафаел Трухиљо во Домениканска република во 1960 година.
