Со многу диети може да се симнат килограмите на краток рок, но во исто време може да се ослабне имунитетот и да се намали нивото на енергија. Нутритивната диета е понова и целта не е изгладнување, туку задоволување на потребите на организмот со нутритивно богата храна во помали количества.
Наместо да се фокусира на строго броење калории или на специфичниот сооднос на макронутриентите, овој пристап се фокусира на храна богата со есенцијални микронутриенти, кои го поддржуваат целокупното здравје. Типична нутритивна диета вклучува и растителни и животински производи, како што се: животински протеини – месо, риба, морска храна и јајца; здрави масти – путер, растителни путери и екстра девствено маслиново масло; зеленчук, овошје, јаткасти плодови и семиња; избран зеленчук со скроб – сладок компир, тиква.
Избегнувајте преработена храна, вклучувајќи рафинирани шеќери, индустриски масла и жита што содржат глутен. Многу е важно да му обезбедите на телото витамини и минерали, а некои можат да помогнат при слабеењето преку подобрување на метаболизмот, нивото на енергија или регулација на мастите.
Главните витамини и минерали се:
Витамини Б (Б6, Б12): го поддржуваат енергетскиот метаболизам, помагајќи му на телото да ја претвори храната во енергија.
Витамин Д: Може да помогне во регулирањето на телесните масти и често се поврзува со подобрување на тежината.
Витамин Ц: Помага во оксидацијата на мастите, се препорачува за сите што се борат со обемот на половината.
Магнезиум: Помага во производството на енергија и е поврзан со намалување на индексот на телесна маса (БМИ).
Калциум: Во комбинација со витамин Д е корисен за топење на масните наслаги.
