И покрај фактот дека Сонцето е еден од најважните аспекти на нашиот живот, сè уште не ги знаеме сите механизми зад процесите што се случуваат на него. Научниците цело време внимателно следат и анализираат настани на ова светлечко тело, а сега забележаа нешто многу необично. Тие забележаа дека материјалот од плазмата што избила од површината на Сонцето се одвоил и над соларниот северен пол и формирал еден вид вител.
Експертите тврдат дека досега не виделе такво нешто и дека се потребни дополнителни анализи за да се утврди дали навистина се случило или не и што точно значи тоа, пишува „Сајенс алерт“.
Сонцето моментално поминува низ фаза на зголемена активност. Досега секој ден годинава исфрлаше понекој пламен. Во јануари дури лансира неколку од нив во категориите X и M. Категоријата X е најсилната можна ерупција на Сонцето, додека блесоците од категоријата М се послаби. Но тоа не е причина за загриженост – нашата ѕвезда поминува низ различни циклуси на активност на секои 11 или повеќе години. Сончевите циклуси имаат огромно влијание врз Сончевиот систем, но ние ги разбираме релативно лошо. Научниците мислат дека тие веројатно се поврзани со сончевото магнетно поле.
На секои 11 години магнетните полови на Сонцето се менуваат, северот станува југ и обратно. Таа ситуација се совпаѓа со она што е познато како соларен максимум, кога Сонцето испушта најмногу блесоци и коронални масовни исфрлања и има најмногу сончеви дамки.
Потоа следува период на смирувачка активност, па повторно започнува периодот на соларниот максимум. Сега нашата ѕвезда е во таа фаза, односно на прагот на споменатиот максимум. Циклусите на активност се карактеризираат и предвидуваат врз основа на еден фактор: бројот на сончеви дамки. Научниците го забележале мистериозниот поларен вител на 2 февруари.
