Синоќа во галеријата на домот на културата „Иван Мазов Климе“ во Кавадарци беше отворена третата самостојна изложба на младиот моден дизајнер Пане Хаџи -Василев. Тој изложбата ја насловува како „ Las mujeres“ или „Жените“ и содржи дела од последниот циклус кој го развива по паузата од неговата претходна изложба. Делата се инспирирани од патувањата особено од живописната Шпанија и претставува нешто ново и различно од неговите претходни проекти кои исто така беа исклучително креативни и оригинални.
– Како моден дизајнер, често се среќавам со жени кои се жалат на нивниот надворешен изглед и несовршеноста. Лично, како некој кој се стреми секогаш кон совршенство и ред, можам да се поврзам со тие чуства, но како уметник оваа перспектива ми овозможи да ги искористам предностите и креативноста и да ги изразам тие несовршености на платното. Оваа изложба сепак е различна – тука нема место за совршенство, туку напротив таа е израз на слободен стил, каде апстракцијата и современата уметност се спојуваат за да го претстават духовниот и физичкиот аспект на жената. Делата се насликани со чисти пастелни бои, внимателно распоредени така што ниедна боја не е поставена веднаш до друга. Ако има жолта, таа не е соседна со друга жолта, туку со сосема различна боја. Овој специфичен распоред не се стреми да прикаже совршенство, туку да ја слави уникатната убавина која секоја жена ја носи – аспект на женственоста дури и во своите несовршености. Со оваа изложба на еден начин како моен дизајнер претставувам современ поглед на тоа како недостатоците можат да се претворат во нешто исклучително и моќно, ослободено од граници и правила – изјави авторот на изложбата, Пане Хаџи – Василев.
