Американскиот пратеник Стив Виткоф изјави дека разговорите за прекин на огнот во руската војна против Украина ќе продолжат в недела во пристанишниот град Џеда во Саудиска Арабија
Закажани преговорите за прекин на огнот во Украина
Американскиот пратеник Стив Виткоф, клучен доверлив човек на американскиот претседател Доналд Трамп, изјави за Фокс њуз дека одредени детали сè уште треба да се испеглаат. Тој не даде попрецизни информации за планираната средба во Џеда во Саудиска Арабија.
Русија се согласи со предлогот на САД за запирање на сите напади врз украинската енергетска инфраструктура на 30 дена, доколку Украина го стори истото тоа, соопшти Кремљ по телефонскиот разговор меѓу Трамп и рускиот претседател Владимир Путин.
Американскиот пратеник Стив Виткоф е оптимист
– Секако дека сум оптимист дека Украинците ќе се согласат – рече Виткоф. Претставниците на Соединетите Американски Држави и Украина се состанаа веќе и имаат искуство од претходната средба во Џеда за темите и позициите за завршување на војната на Москва против Украина. По разговорот на Трамп со Путин, Виткоф спомена „одреден напредок“ во процесот.
– Би го пофалил претседателот Путин за сè што направи денеска за време на тој повик за да ја приближи својата земја до конечниот мировен договор – рече Виткоф, кој се сретна со Путин минатата недела.
Украинскиот претседател Володимир Зеленски изјави дека Украина е отворена за суспендирање на украинските ракетни (и со дронови) напади врз руските енергетски капацитети на 30 дена, доколку Москва го стори истото тоа, но дека сè уште му требаат информации за што точно се договориле Трамп и Путин.
