Американските медиуми „Си-ен-ен“, „Ем-ес НАУ“ и „Политико“ ја проширија тужбата против администрацијата на претседателот Доналд Трамп поради ограничувањата за пристап на нивните новинари до Белата куќа. Медиумите тврдат дека ограничувањата продолжиле и покрај судската одлука со која беше наложено повторно да им се овозможи пристап, објави „Си-ен-ен“.
Со дополнетата тужба, трите медиуми бараат од федералниот суд во Вашингтон да ѝ забрани на Белата куќа да ги исклучува нивните новинари од групата репортери кои известуваат од непосредна близина на претседателот. Тоа, меѓу другото, се однесува на пристапот до Овалната соба и до претседателскиот авион „Ер форс уан“.
На 24 септември, федералниот судија Тимоти Кели издаде неколку налози со кои ѝ наложи на администрацијата на Трамп повторно да им овозможи пристап до Белата куќа на новинарите од трите медиуми.
„Си-ен-ен“, „Ем-ес НАУ“ и „Политико“ наведуваат дека и по судската одлука нивните новинари продолжиле да бидат исклучувани од одредени простории и настани во Белата куќа.
Според медиумите, ваквата практика претставува повреда на Првиот амандман на Уставот на САД, кој ја гарантира слободата на говорот и ја штити слободата на медиумите. Со проширувањето на тужбата, тие бараат судска интервенција за да се обезбеди почитување на претходните налози и да се спречи натамошно ограничување на нивниот пристап.
