Норвешката полиција го уапси поранешниот командант на платеничката група „Вагнер“ под сомнение дека се обидел илегално да ја премине границата со Русија, откако претходно оваа година побарал азил во Норвешка, потврди адвокатот на уапсениот.
Андреј Медведев, кој избега од Русија во јануари преку руската арктичка граница со Норвешка, опиша како побегнал додека руските чувари пукале кон него. Тој зборуваше за тоа како се борел во Украина како член на групата „Вагнер“, пренесе „Хина“, повикувајќи се на „АФП“.
Полицијата соопшти дека маж на околу 20 години бил приведен поради обид за илегално преминување на руската граница, но не го именувала. Преминувањето на границата со Русија е дозволено само на одредени места. Апсењето на Медведев се должи на недоразбирање, изјави за „Ројтерс“ неговиот норвешки адвокат Бринјулф Риснес.
– Тој беше таму горе за да види дали може да го најде местото каде што преминал (во Норвешка во јануари). Тој бил запрен додека бил во такси. Никогаш не бил блиску до границата. Никогаш не му била намерата да ги премине границите (во Русија) – рече Риснес.
Во моментот на неговото пристигнување во Норвешка, Медведев рече дека бара азил затоа што се плашел за својот живот откако бил сведок на убиствата и малтретирањето на затворениците донесени на фронтот во Украина.
Неговото бегство во јануари беше на насловни страници низ светот како редок пример во времето кога некој пребегнал во западна земја, додека тврдел дека се бори за Русија како платеник во војната во Украина.
Во мај, тој во видео објавено на Јутјуб рече дека сака да се врати во Русија, иако верува дека тоа може да биде опасност за неговиот живот, опишувајќи се себеси како „момче од голема игра“ од која повеќе не сака да биде дел.
Риснес рече дека Медведев има право да се врати во Русија ако сака, но дека „треба да се случат многу промени“ за тој безбедно да се врати.
Во април Медведев беше осуден во Норвешка за учество во тепачка и носење огнено оружје, но беше ослободен од обвинението за насилство врз полицијата. Тогаш тој рече дека „гледа кон иднината“ и се надева на азил.
