Американскиот бизнисмен Илон Маск стана првиот човек кој има нето богатство од 400 милијарди долари, објави денес Блумберг. Нето богатството на Маск се зголеми за околу 50 милијарди долари по инсајдерска продажба на неговиот удел во СпејсИкс, со што неговото богатство достигна 439,2 милијарди долари, според индексот на милијардери на Блумберг.
Акциите на Тесла пораснаа за околу 65 отсто од периодот пред изборите во САД во ноември, поттикнати од очекувањата дека новоизбраниот претседател Доналд Трамп ќе го насочи производството на самоуправувачки автомобили и ќе ги елиминира даночните олеснувања за електричните возила што им помагаат на ривалите на Тесла.
Во меѓувреме, вредноста на компанијата за вештачка интелигенција иксАИ на Маск е повеќе од двојно зголемена од мај, достигнувајќи 50 милијарди долари, а Волстрит журнал минатиот месец објави дека победата на Трамп помогнала да се поттикне обновениот интерес за компанијата.
Договорот, кој ја вреднува приватната компанија за истражување на вселената на околу 350 милијарди долари, го прави СпејсИкс највредниот приватен стартап во светот.
Компанијата заработува голем дел од своите пари од договорите со американската влада, а Трамп неодамна ја пофали визијата на Маск за испраќање астронаути на Марс во предизборните говори и му се придружи на бизнисменот на лансирањето на СпејсИкс во Тексас веднаш по изборите.
Се очекува Маск да има клучна улога во новата американска администрација, како еден од шефовите на новоформираниот Оддел за владина ефикасност, што ќе му даде авторитет и директна врска со Белата куќа, пишува Блумберг.
