Иран и Саудиска Арабија денес се договорија да ги обноват дипломатските односи и да отворат амбасади, по повеќегодишна тензија меѓу двете земји, јавуваат агенциите.
Договорот, кој беше постигнат во Пекинг оваа недела, претставува голема дипломатска победа за Кина, бидејќи земјите од Заливот гледаат дека САД полека се повлекуваат од поширокиот Блиски Исток.
Одлуката, исто така, доаѓа додека дипломатите се обидуваат да стават крај на повеќегодишната војна во Јемен, конфликт во кој и Иран и Саудиска Арабија се длабоко вовлечени.
Двете земји објавија изјава за договорот заедно со Кина, која посредуваше во него. Кинеските државни медиуми не го објавија веднаш договорот, според АП.
Иранските државни медиуми објавија фотографии и видеа за кои велат дека се направени во Пекинг за време на состанокот.
– По спроведувањето на одлуката, министрите за надворешни работи на двете земји ќе се сретнат за да се подготват за размена на амбасадори – објави иранската државна телевизија.
Како што се додава, разговорите траеле четири дена, а амбасадите треба да бидат отворени за два месеци.
Набргу по иранското соопштение, саудиските државни медиуми почнаа да ја објавуваат истата изјава.
Саудиска Арабија ги прекина односите со Иран во 2016 година, откако демонстрантите упаднаа во нејзината амбасада во Техеран поради егзекуцијата на шиитскиот муслимански свештеник во Ријад – потсетува Ројтерс.
Иран, водечката шиитска држава на Блискиот исток и Саудиска Арабија, регионална сунитска сила, ги поддржуваат спротивставените страни во војните во Јемен и Сирија.
