Хрватска
Вчера беше пуштен во сообраќај Пељешкиот мост, најголемиот инфраструктурен проект во Хрватска, чија изградба со речиси 80 отсто ја финансираше Европската Унија од сопствени средства, а го изгради кинеска државна компанија. Кинеската компанија го доби договорот за изградба во 2018 година, по цена од околу две милијарди куни (265 милиони евра) и рок од 36 месеци, а градежните работи официјално започнаа на 31 јули 2018 година.
Мостот е дел од проектот „Патна врска со јужна Далмација“ и го претставува најважниот геостратегиски проект од национален интерес, бидејќи со неговата изградба е воспоставен територијалниот континуитет на хрватската територија.
Вкупната вредност на проектот се проценува на 420,3 милиони евра и опфаќа изградба на мост, пристапни патишта и обиколница кај Стон.
Периодот на изградбата беше пет години за сите фази, а Европската Унија учествуваше со 330 милиони евра или 78,5 отсто од вредноста на проектот.
Мостот е интегрална хибридна конструкција со 13 распони, од кои пет главни (централни) распони се долги 285 метри, шест централно поставени армирано-бетонски столбови се високи 33 метри, како и две ленти заедно со лента за застанување, која ќе служи за одржување на мостот.
Мостот е долг 2.400 метри, а навигацискиот профил под мостот, договорен со експертската група на БиХ, е 200 на 55 метри.
