Црна Гора
Црногорските лидери мора брзо да пристапат кон формирање нова влада и да назначат претседател на парламентот. Ова го соопштија известувачот на ЕУ за Црна Гора, Тонино Пицула, и претседателот на собраниската комисија за стабилизација и асоцијација, Владимир Билчиќ.
Ние континуирано го следиме развојот на политичките настани во Црна Гора и ги поздравуваме мирните и уставните транзиции. Повикуваме на континуирано почитување на демократските процеси, норми и стандарди во овие времиња – рекоа европските претставници.
Тие нагласуваат дека создавањето пат кон стабилно парламентарно мнозинство и напредокот на Црна Гора во реформскиот процес се клучно прашање.
Политичката неактивност ги ограничува реформската агенда на земјата и последиците од нејзината амбиција за ЕУ. Црна Гора напредуваше најмногу меѓу кандидатите за ЕУ и веќе е дел од НАТО. Потребни ѝ се предвидливо и стабилно парламентарно мнозинство и проевропска влада за да ја внесе во ЕУ – велат во заедничката изјава Пицула и Билчиќ.
Пред неколку дена црногорскиот парламент изгласа недоверба на Владата на Здравко Кривокапиќ, со што ѝ престанува мандатот на Владата. За уривање на Владата гласаа сите опозициски партии предводени од Демократската партија на социјалистите на Мило Ѓукановиќ и членовите на досегашната владејачко мнозинство Граѓанското движење УРА и Цивис.
Според Уставот на Црна Гора, владата на Кривокапиќ ќе продолжи да работи до изборот на нова влада. А со изгласувањето недоверба, се отвора процесот на преговарање за формирање нова влада.
Собранието на Црна Гора на вонредна седница го разреши претседателот на Собранието, Алекса Бечиќ. За неговото разрешување гласаа 43 пратеници на опозицијата и на коалицијата „Црно-бело“, додека против беа 36 пратеници.
