ОДБОЈКА
Светскиот првак Србија и олимпискиот вицешампион Бразил вечерва (20 часот) ќе играат во финалето на Светското првенство (СП) за одбојкарки, кое се игра во Полска и во Холандија.
Србија ја освои првата светска титула на претходниот планетарен шампионат, во 2018 година во Јапонија, тогаш со победата во финалето со Италија. Репрезентацијата на Бразил е двократен олимписки првак (2008 година во Пекинг и во 2012 година во Лондон), на СП претходно играла трипати во финалето, на Летните олимписки игри (ЛОИ) лани во Токио (Јапонија) го освои сребрениот медал, а на истите ЛОИ репрезентацијата на Србија беше трета.
Србија нема ниту еден пораз од почетокот на СП 2022, загуби само два сета за време на групната фаза, потоа уште два од домаќинот Полска во четврт-финалето и еден сет во мечот со актуелниот олимписки шампион САД во полуфиналето.
По поразот од Јапонија во првата фаза на годинашното Светско првенство во Полска и во Холандија, Бразил беше трето во групата Д, но потоа ја помина втората групна фаза без пораз, во четврт-финалето тие направија неверојатно враќање од 0-2 за победа на мечот со Јапонија, а во полуфиналето ја совладаа Италија во четири сета.
