- Ф1-авантурата на Антонели почна со неговиот татко Марко, возач на спортски автомобили
Откако влезе во техничката зона на Формула 1 (Ф1) скриен во куп гуми, Кими Антонели ги прави работите на свој начин. Сега, 20-годишниот Италијанец стои сам како најмлад шампион во Ф1, откако го освои третото место на трката за големата награда на Мексико Сити во неделата, што беше повеќе од доволно за да ја обезбеди титулата, пишува агенцијата „Асошиејтед прес“
Ф1-авантурата на Антонели почна со неговиот татко Марко, возач на спортски автомобили. Неговиот тим беше вклучен во трка за поддршка на големата награда на Германија во 2014 година, а неговиот седумгодишен син сакаше да ѕирне зад сцената на Формула 1, но немаше пристап.
– Не знам ни како ме собра во гумата, но беше навистина тесна. Плус, ставивме чадор одозгора за да не изгледа, знаете, сомнително или нешто слично – рече Антонели додека се подготвуваше да го има своето деби во Ф1 минатата година.
Излегување од сенката на великаните на Ф1
На секој чекор од патот, Антонели е споредуван со великаните на спортот. Тој беше замена на Луис Хамилтон во Мерцедес кога седумкратниот шампион замина во Ферари, тој беше одговорот на шефот на Мерцедес, Тото Волф, на Макс Ферстапен, чудото од Ред Бул што го имаше своето деби во Ф1 на 17 години, тој беше тинејџерскиот кандидат за титулата што го бркаше рекордот на Себастијан Фетел како најмлад шампион, пишува АП.
А тука е и неговото име.
Кога се родил во 2006 година, неговите родители се обидувале да смислат карактеристично средно име за бебето Андреа Антонели. Еден семеен пријател го предложил „Кими“. Во тоа време, Финецот Кими Раиконен беше еден од највозбудливите возачи во Ф1 и ја освои титулата за Ферари веднаш по првиот роденден на Антонели.
Антонели рече дека тоа не е директна почит.
– Моето семејство има тркачка историја, а, исто така, и овој наш добар пријател има тркачка историја. Па затоа реши да ми го даде Кими, но не се однесуваше на вистинскиот возач. Едноставно му падна на памет – рече тој минатата година, пренесе АП.
Ангажиран во програмата за млади возачи на Мерцедес, Антонели исплива преку картинг-натпреварите и наскоро освои титули откако се префрли на автомобили во 2021 година.
– Ако се погледне патот на Кими низ младинските категории, мислам дека на сите им беше сосема јасно дека тој поседува нешто многу посебно. Неговите кругови изгледаат многу на границата, но некако успева да направи круг кога е потребно. Тоа беше многу импресивно за гледање – рече Шарл Леклер од Ферари во септември, пренесе АП.
Антонели се претстави во Ф1 со инцидент
Три драматично различни викенди на трката за големата награда на Италија покажуваат промена во кариерата на Антонели во Формула 1. Кога Антонели, тогашен возач на Формула 2, го доби своето деби во викендот на трката во Ф1 на тренинг-сесија за Мерцедес во Монца во 2024 година, тој се удри во бариерата пред домашната публика.
Мерцедес остана со него, а Антонели гледаше со широко отворени очи и понекогаш беше преплашен кога дебитираше во Ф1 на 18 години. Поканувањето на целиот негов клас на домашната трка во Италија минатата година беше начин да остане во контакт со своите корени, но тоа само го зголеми чувството дека е дете во светот на возрасните, пишува АП.
Неговата дебитантска сезона покажа блесоци на талент, како кога стана најмладиот возач што освоил пол-позиција во Формула 1, во Мајами, но и премногу грешки. Серијата лоши резултати на европските трки го наведе Волф постојано да го опишува возењето на Антонели како „разочарувачки“, пишува АП.
– Дозволив притисокот да ме уништи и мене во тој период, бидејќи чувствував дека разочарувам толку многу луѓе што веруваа во мене – рече Антонели.
Антонели одвои време да ги преиспита работите и да најде нов фокус за 2026 година, оставајќи свој белег речиси веднаш со дебитантската победа во Кина, во март, со што почна серија од пет победи. Годинашната трка за големата награда на Италија беше одлично возење, бидејќи Антонели ја надмина казната со моторот и победи откако стартуваше од 19. место на стартната линија.
Зошто ова беше година на Антонели
Најголемата промена во прописите на Формула 1 во претходниве децении отвори можности за нов конкурент како Антонели. Неговиот природно агресивен стил на возење и инстинктивна контрола на автомобилот се чини дека одговараат на автомобилите од 2026 година и тој се справи подобро од неговиот тимски колега Џорџ Расел со големата зависност од електрична хибридна енергија. Расел ја издвои и силата на Антонели во лизгави услови како фактор што прави разлика.
– Со оглед на тоа како тргнаа работите годинава, тоа е некако совршен стил на возење за овие автомобили – рече Расел. Н.М.
„Уште се обидувам да сфатам и да разберам што се случи“
Откако ја помина целната линија на трката за големата награда на Мексико Сити зад победникот на трката Макс Ферстапен и зад Луис Хамилтон, креаторот на историјата на Формула 1, Кими Антонели, ги стави рацете на воланот и извика: „Успеавме, успеавме“, пишува агенцијата „Асошиејтед прес“ (АП). Иако 20-годишниот возач на Мерцедес беше трет на трката во неделата, тој стана најмладиот шампион во историјата на Формула 1. Себастијан Фетел беше претходниот најмлад шампион, на 23 години во 2010 година.
– Уште се обидувам да сфатам и да разберам што се случи, кога работиш толку напорно, а потоа конечно го постигнуваш тоа, навистина е посебно. Сите емоции доаѓаат, да можам да го имам овој момент со моето семејство е момент што секогаш ќе го паметам – рече Антонели, кому му се придружија неговите родители и помладата сестра, пренесе АП.
Антонели, кој ја обезбеди титулата четири трки пред крајот на сезоната, рече дека последниот круг бил комплициран од возбудата од она што го постигнал, почнал да ужива во него дури и пред да ја помине целната линија.
– Мислам дека изгубив две секунди затоа што не можев да гледам напред. Беше многу посебно, многу спомени ми поминаа низ главата во тој момент и сето тоа го изнесов откако остварив еден од моите најголеми соништа – рече Антонели, кој е првиот Италијанец што ја освои титулата по Алберто Аскари во 1953 година. Н.М.
Најмлади шампиони во Формула 1
Кими Антонели, Италија 20 години 68 дена (2026 г.)
Себастијан Фетел, Германија 23 години 133 дена (2010 г.)
Луис Хамилтон, Велика Британија 23 години 300 дена (2008 г.)
Фернандо Алонсо, Шпанија 24 години 57 дена (2005 г.)
Макс Ферстапен, Холандија 24 години 73 дена (2021 г.)
Емерсон Фитипалди, Бразил 25 години 273 дена (1972 г.)
Извор: АП
