Леброн Џејмс, кој ги држи рекордите како најмлад кошаркар што ја достигнал секоја значајна бројка поени од 5.000 до 35.000, а е и во листите со најдобрите 10 на сите времиња за асистенции, украдени топки, дефанзивни скокови, постигнати поени од поле и постигнати тројки, сега има 38.390 поени во мечеви во НБА-лигата, надминувајќи го досегашниот рекорд на Карим Абдул-Џабар од 38.387
КОШАРКА – НОВ ПОЕНТЕРСКИ РЕКОРД НА НБА-ЛИГАТА
Кошаркарот на Лос Анџелес лејкерс, Леброн Џејмс (38 год.) стана најдобриот стрелец во историјата на НБА-лигата, откако уфрли 38 поени во поразот од Оклахома, со 130-133, дома. Во својата 20-та сезона во најквалитетната кошаркарска лига, Џејмс со шут на 10,9 секунди до крајот на третата четвртина го постави новиот рекорд од 38.390 поени, надминувајќи го досегашниот рекорд на Карим Абдул-Џабар за три поена (38.387). Мечот накратко беше прекинат поради мала церемонија во знак на постигнатиот рекорд.
– Рекордот стоеше речиси четириесет години, а многумина мислеа дека никогаш нема да биде соборен. Леброн, ти си најдобриот стрелец во историјата на НБА – изјави комесарот на НБА-лигата, Адам Силвер.
Карим Абдул-Џабар, кој му предаде топка на славеникот, играше во НБА 20 сезони во Милвоки и во ЛА лејкерс, освои по шест титули и признанија за најкорисен играч (МВП) во регуларниот дел од сезоната и двапати беше прогласен за МВП на финалињата, пишува „Би-би-си“.
– Да се биде во присуство на легенда и великан како Карим значи многу. На сите што некогаш биле дел од ова патување со мене во претходните 20 години, само сакам да им кажам многу благодарам – рече Џејмс, кој ги држи рекордите како најмлад кошаркар што ја достигнал секоја значајна бројка на поени од 5.000 до 35.000.
Џејмс постигна 23.119 поени во 849 натпревари за Кавалирс во текот на 11 сезони (во два наврати). Тој постигна 7.919 поени за Мајами на 294 меча во четири сезони и сега има 7.314 поени во 266 натпревари во пет сезони за ЛА лејкерс. Тој е и во листите со најдобрите 10 на сите времиња за асистенции, украдени топки, дефанзивни скокови, постигнати поени од поле и постигнати тројки.
Во текот на сѐ уште активната кошаркарска кариера, Џејмс често е споредуван со легендарниот Мајкл Џордан, кој освои шест шампионски титули. Запрашан по натпреварот со Оклахома дали е најдобриот НБА-кошаркар на сите времиња, Џејмс рече: „Ќе оставам сите други да одлучат кој е тоа или само да зборуваат за тоа. Јас лично ќе му се спротивставам на секој што некогаш ја играл оваа игра. Но секој ќе одлучи кој е неговиот фаворит“, пишува британскиот „Би-би-си“.
Џејмс освои два шампионски прстена со Мајами и по еден со Кливленд и со Лос Анџелес лејкерс, по четири пати беше МВП во регуларниот дел на НБА-лигата и на финалињата, во 2020-та стана првиот кошаркар што бил МВП на финалињата со три различни клуба, 19 пати настапи на олстар-натпреварите, со репрезентацијата на САД освои две злата на летни олимписки игри (во 2008 и во 2012 година) и една бронза (во 2004-та), како и бронза на Светското првенство во 2006 година. Г.И.
НАЈДОБРИ СТРЕЛЦИ ВО НБА-ЛИГАТА
КОШАРКАР ПОЕНИ
Леброн Џејмс 38.390
Карим Абдул-Џабар 38.387
Карл Мелоун 36.928
Коби Брајант 33.643
Мајкл Џордан 32.292
Дирк Новицки 31.560
Вилт Чембрлен 31.419
Шекил О`Нил 28.596
Кармело Ентони 28.289
Мозес Мелоун 27.409
