ФУДБАЛ – СП 2026
- Финалето на СП 2026 првпат ќе биде дуел за светска титула меѓу актуелни континентални прваци и првпат тоа е меч меѓу двете првопласирани селекции на ранг-листата на ФИФА. Шпанија и Аргентина ќе играат в недела (од 21 часот), во Њу Џерси (САД)
Финалето на годинашното Светско првенство првпат ќе биде дуел за планетарната фудбалска титула меѓу актуелни прваци на Европа и на Јужна Америка и првпат тоа е меч меѓу двете првопласирани селекции на ранг-листата на Светската фудбалска федерација (ФИФА) во пресрет на еден мундијал, откако ФИФА го воведе рангирањето во 1992 година. Европскиот првак Шпанија ќе игра со светскиот и јужноамерикански шампион Аргентина в недела (21 часот), во Њу Џерси (САД).
Аргентина, прва на ранг-листата на Светската фудбалска федерација објавена во јуни, ќе игра за својата четврта светска титула и да стане првиот шампион на две планетарни првенства по ред откако Бразил го направи тоа во 1958 и во 1962 година. Досега светската титула ја одбрани и репрезентацијата на Италија, која славеше на првенствата во 1934 и во 1938 година. За Аргентина натпреварот в недела е седмо финале на мундијалите (победи во 1978, 1986 и во 2022 година).
Шпанија, второпласирана на листата на ФИФА, игра за својата втора светска титула, откако триумфира на СП во 2010 година, во досега единственото финале за таа репрезентација. И Шпанија и Аргентина ги освоија континенталните титули во 2024 година (Аргентина ја освои 16-та, со што води на листата со трофеи во Јужна Америка, а Шпанија четвртата, со која, исто така, поведе на листата со освојувачи на европски фудбалски титули).
Двете репрезентации влегуваат во финалето на СП 2026 со импресивни низи без пораз, откако Шпанија има серија од 37 натпревари без пораз во сите натпреварувања и пријателски натпревари (28 победи, девет ремија), а Аргентина е непоразена во претходните 13 натпревари на СП (11 победи и две ремија), пишува агенцијата „Асошиејтед прес“ (АП).
Откако во финалето в недела ќе се сретнат Шпанија и Аргентина, ќе заврши досега невидената шампионска низа на планетарните шампионати. На претходните шест светски првенства, од 2002 до 2022 година, имаше шест различни светски шампиони, и тоа Бразил во 2002 година, Италија во 2006-та, Шпанија во 2010-та, Германија во 2014-та, Франција во 2018-та и Аргентина во 2022 година. Н.М.
Скалони може да израмни селекторски рекорд на Поцо
И шампионската репрезентација на 23. Светско првенство (СП) во фудбал ќе има домашен селектор, откако во финалето ќе се сретнат Шпанија и Аргентина. Предводник на актуелниот европски првак Шпанија е Шпанецот Луис де ла Фуенте, а кормилар на актуелниот светски првак Аргентина е Аргентинецот Лионел Скалони. Сите светски шампиони досега биле предводени од домашни селектори. Скалони во финалето ќе се обиде да го израмни рекордот на Италијанецот Виторио Поцо, кој е единствениот селектор со две светски титули (во 1934 и во 1938 година), а Де ла Фуенте да стане 22. селектор што освоил светска титула. Н.М.
СП 2026 1/16-ФИНАЛЕ
Германија – Парагвај 1-1 (3-4 п.)
Франција – Шведска 3-0
Јужна Африка – Канада 0-1
Холандија – Мароко 1-1 (2-3 п.)
Бразил – Јапонија 2-1
БСК – Норвешка 1-2
Мексико – Еквадор 2-0
Белгија – Сенегал 3-2
Англија – ДР Конго 2-1
САД – БиХ 2-0
Шпанија – Австрија 3-0
Португалија – Хрватска 2-1
Швајцарија – Алжир 2-0
Австралија – Египет 1-1 (2-4 п.)
Аргентина – Зелено`ртски О. 3-2
Колумбија – Гана 1-0
ОСМИНАФИНАЛЕ
Канада – Мароко 0-3
Парагвај – Франција 0-1
Бразил – Норвешка 1-2
Мексико – Англија 2-3
Португалија – Шпанија 0-1
САД – Белгија 1-4
Аргентина – Египет 3-2
Швајцарија – Колумбија 0-0 (4-3 п.)
ЧЕТВРТ-ФИНАЛЕ
Франција – Мароко 2-0
Шпанија – Белгија 2-1
Норвешка – Англија 1-2
Аргентина – Швајцарија 3-1
ПОЛУФИНАЛЕ
Франција – Шпанија 0-2
Англија – Аргентина 1-2
МЕЧ ЗА ТРЕТО МЕСТО
Франција – Англија утре, 23 ч.
ФИНАЛЕ
Шпанија – Аргентина недела, 21 ч.
