Техно
Идејата за паметни огледала, иако изгледа многу футуристичка, никогаш не се вкоренила во нашите домови. Тоа, се разбира, не треба да ги обесхрабрува производителите да истражуваат различни идеи, а се чини дека една компанија е на работ да вдахне нов живот во оваа технологија. Компанијата „Витингс“, која произведува паметни ваги и часовници, сега сака да комбинира технологии за следење на здравствените параметри, вештачка интелигенција и паметни огледала. На саемот во Лас Вегас, таа претстави концептуален уред наречен „омниа“, со кој сака да го промени начинот на кој се грижиме за нашето здравје. Според компанијата, „омниа“ е „трансформативно искуство што повторно ги обмислува можностите за дигитално здравје“, а дизајнирано е да го скенира целото тело на корисникот секојдневно.
Ако некогаш стане вистински производ, по скенирањето би можело да им обезбеди на корисниците детални увиди за телесната тежина, составот на телото, како и за здравјето на срцето и белите дробови. Следењето на другите параметри, како што се квалитетот на спиењето, активноста и исхраната, ќе се врши и ќе се синхронизира со помош на паметни часовници во текот на денот.
Самото огледало би било интерактивно преку допир, со интеграција на гласовен асистент напојуван од вештачка интелигенција. „Омниа“ би можело да послужи и како портал за телемедицина, до кој лекарите би имале пристап или да даваат совети врз основа на достапните информации.
„Витингс“ тврди дека „омниа“ моментално е во развој, со клинички испитувања и дополнителни функции базирани на вештачка интелигенција, кои сè уште се во тек. Дури и ако никогаш не стане производ што ќе се најде во нашите домови, функциите што се развиваат за него ќе бидат достапни во некоја форма преку апликацијата „Витингс“ во текот на 2025 година.
