Благој Нацоски одржа втор концерт годинава во Италија, со атрактивна македонска програма. Концертот се одржа во Сан Квирино ди Порденоне, по негова иницијатива, а во чест на 30-годишнината од дипломатските односи помеѓу Македонија и Италија. Публиката имаше можност да го чуе македонскиот јазик преку стиховите на Блаже Конески, Ацо Шопов, Славко Јаневски, односно музиката на Тодор Скаловски, Благој Цанев, Трајко Прокопиев, Дарија Андовска, Дино Имери и Андреј Наунов, како и свитата „Македонија“ создадена од Алесандро Д’Агостини. На концертот наречен „Ноти како мостови” настапи и сопранистката Паола Кампоново, во пијано-придружба на Алфредо Блесано, инаку и двајцата Италијанци.
– Извонреден концерт со Благој Нацоски, Паола Кампоново и Алфредо Блесано во Сан Квирино ди Порденоне. Исклучително префинета програма, повод за одбележување на триесетгодишнината од почетокот на дипломатските односи меѓу Македонија и Италија, во која беа изведени голем број камерни арии компонирани од македонски музичари, придружени со италијански дела и дуети. Алфредо Блесано, мошне талентиран пијанист, вешто ги придружуваше Кампоново, со која победи на натпреварот „Респиги“ во 2016 година, и тенорот Благој Нацоски, вистинската ѕвезда на вечерта. Тенорот, многу активен на националната и меѓународната сцена, уште еднаш покажа глас со многу цврст центар, полн со бои и нијанси, сигурни високи тонови, многу долг воздух и моќен волумен, но пред сѐ покажа дека е чувствителен и префинет интерпретатор, способен да ги измеша со интензитет сензациите опишани во стиховите што ги отпеа, никогаш повнимателен кон музичката изведба, но сепак одлична, отколку кон интерпретативната. Уметник во служба на уметноста. Редок дар во време на претерана самореференцијалност и во кое приоритетите премногу често се губат. Во Сан Квирино беше предложена сложена програма, секако префинета, главно современа. Интересен експеримент: предлагање нешто непознато, или речиси непознато, во нов контекст, на необична публика – пишува магазинот за култура „Ла платеа“.
