Меѓународна криминална мрежа која преку лажни платформи за онлајн тргување измамила граѓани за повеќе од четири милиони евра е цел на голема полициска операција во која учествувале и македонските истражни органи. Во координираната акција уапсени се седум лица, извршени се претреси на 17 локации и запленети се повеќе од 100 сервери, соопштија Основното јавно обвинителство за гонење организиран криминал и корупција и Европравда (Eurojust).
Според информациите на Европравда, истрагата открила дека криминалната мрежа користела интернет-страници кои изгледале како легитимни платформи за инвестирање во криптовалути, девизи и акции. Потенцијалните жртви биле привлекувани со ветувања за огромна заработка за краток период.
– Измамниците ветувале огромни профити за кратко време преку тргување со криптовалути, странски валути и акции – се наведува во соопштението на Европравда.
Шемата функционирала така што жртвите најпрво вложувале помали суми пари, по што на платформите им биле прикажувани лажно зголемени добивки. На тој начин се создавала претстава дека инвестициите се успешни, а наводните брокери потоа ги убедувале граѓаните да вложат значително поголеми износи.
– Откако ќе префрлеле помала сума пари, на жртвите им биле прикажувани надуени добивки, поради што платформата изгледала легитимно. Потоа наводните брокери вршеле психолошки притисок врз нив да инвестираат дополнителни големи суми – соопшти Европравда.
Проблемите започнувале кога инвеститорите ќе побарале да ги повлечат своите пари.
Според Европравда, измамниците користеле различни изговори и тактики за одложување за да го спречат повлекувањето на средствата. На крајот, лицата што стоеле зад платформите исчезнувале, а оштетените сфаќале дека останале без своите заштеди.
Истрагата започнала по пријава на брачна двојка од Германија
Случајот започнал во 2022 година, кога брачна двојка од Германија пријавила дека ги вложила своите заштеди преку интернет-платформа, но не можела да ги повлече прикажаните добивки.
Пријавата поттикнала истрага која постепено открила меѓународна криминална структура со потенцијални жртви во најмалку 50 држави.
Во претходните години биле спроведени неколку меѓународни акции, вклучувајќи апсења и претреси во 2022 и 2025 година. Анализата на запленетите докази им овозможила на истражителите да идентификуваат дополнителни осомничени, меѓу кои и раководители на кол-центри преку кои жртвите биле убедувани да вложуваат повеќе пари.
Компанија од Кипар и Израел обезбедувала инфраструктура за измамите
Во текот на истрагата била идентификувана компанија со седиште на Кипар и во Израел, за која постојат сомнежи дека обезбедувала интернет-инфраструктура за извршување измами.
Според Европравда, компанијата на различни криминални групи им нудела услуги за поставување лажни инвестициски интернет-страници, преку кои потоа биле измамувани граѓани.
– Анализата откри компанија со седиште на Кипар и во Израел, која наводно нудела криминал како услуга, снабдувајќи различни криминални групи со измамнички интернет-страници што се користеле за онлајн измами – се наведува во соопштението.
Истражителите идентификувале и осомничени клиенти на компанијата во Албанија, Косово и Северна Македонија, за кои се верува дека управувале со измамнички кол-центри.
Токму овие лица, како и серверите што биле користени за криминалните активности, биле цел на последната меѓународна операција.
Македонските обвинители и полицијата учествувале во акцијата
Од Основното јавно обвинителство за гонење организиран криминал и корупција потврдија дека Македонија била дел од меѓународната координирана операција.
– Основното јавно обвинителство за гонење на организиран криминал и корупција, преку Одделот за сузбивање на организиран и сериозен криминал при Бирото за јавна безбедност, преземаше дејствија во меѓународна координирана операција насочена кон разбивање транснационална криминална мрежа инволвирана во организирани инвестициски измами преку интернет – соопшти Обвинителството.
Во операцијата, покрај Македонија, учествувале надлежни органи од Германија, Кипар, Финска, Албанија, Израел и Косово, со поддршка на Европравда и Европол.
Како резултат на активностите, извршени се претреси на 17 локации, меѓу кои и кол-центар во Косово, а запленети се повеќе од 100 сервери, електронски докази и други средства поврзани со сомнителните активности.
Седум лица се уапсени заради нивно предавање или екстрадиција во Германија, каде што се води истрагата.
Засега не е прецизирано дали меѓу уапсените има македонски државјани, ниту колку лица или компании од Македонија се опфатени со постапката.
Штета од над четири милиони евра, жртви во најмалку 50 земји
Според досегашните сознанија на истражните органи, утврдената финансиска штета надминува четири милиони евра.
Сепак, со оглед на тоа што потенцијални жртви се идентификувани во најмалку 50 држави, истрагата има значително поширок меѓународен опфат.
Европравда ја координирала правосудната соработка меѓу државите, вклучително и извршувањето европски налози за истрага и апсење, како и налози за замрзнување средства.
Европол, пак, обезбедил аналитичка и техничка поддршка, а негови експерти биле распоредени во Албанија и Косово за да помогнат во дигиталната форензика и проверките на запленетите податоци.
Операцијата била координирана од седиштето на Европравда во Хаг.
Последната акција претставува продолжение на повеќегодишната меѓународна истрага за откривање на лицата и компаниите што стоеле зад лажните инвестициски платформи, преку кои граѓани од повеќе држави биле наведувани да вложуваат пари со ветувања за високи и брзи заработки.
