Претседателот на Република Српска, Милорад Додик, нагласи дека ентитетот што тој го предводи ќе се отцепи од Босна и Херцеговина (БиХ) доколку високиот меѓународен претставник наметне закон за државен имот, и негираше дека може да заврши во затвор доколку биде осуден за негирање на одлуките на Кристијан Шмит.
-Во моментот кога Шмит ќе го наметне законот за сопственост, таа вечер (ќе) биде донесена одлука за независноста на Република Српска – рече Додик синоќа во интервју за Федералната телевизија.
Тој тврди дека имотот на територијата на Република Српска е сопственост на тој ентитет, но Уставниот суд на Босна и Херцеговина во два наврати ги оспорил законите донесени од властите на тој ентитет. Забраната за располагање со државен имот беше воведена во 2005 година од поранешниот висок меѓународен претставник Педи Ешдаун.
Додик тврди дека Дејтонскиот мировен договор им дал имот на ентитетите.
Во меѓувреме, германскиот политичар на чело на меѓународната заедница во Босна и Херцеговина, Кристијан Шмит, формираше посебна комисија која се обидува да најде решение за ова прашање. Додик, сепак, отфрла какво било наметнување на одлуката на Шмит во корист на државата Босна и Херцеговина.
-Тоа води кон независна Република Српска. Нема да прифатам некој друг да го земе тоа на што ми следува. Ако ми го земате имотот, зошто да бидам со вас. За мене тоа е завршено во Уставот.
Сепак, Додик не објасни како Република Српска, која е еден од двата ентитета во Босна и Херцеговина, ќе стане независна.
Тој најави и дека на Шмит ќе му биде забранет влезот во Република Српска од следната недела, повторувајќи дека нема мандат на висок претставник бидејќи не е назначен во Советот за безбедност на ОН, како што беше случајот со неговите претходници.
-Ако дознаеме дека влегол, ќе биде протеран од Република Српска. Од следната недела тој нема да може да влезе во Република Српска. Еве, нека проба – рече тој.
Запрашан за исходот од кривичната постапка против него, бидејќи Обвинителството на Босна и Херцеговина покрена обвинение за неспроведување на одлуките на високиот претставник во Република Српска, Додик рече дека ќе одговори на поканата на судот, но дека нема да оди во затвор дури и да е осуден.
