Големите разлики во температурите ги полнат амбулантите
Заладувањето, промената на надворешните температури за многумина е здивнување од летните горештини. Но, за многу граѓани значи и здравствени предизвици. Варијациии во крвниот притисок и неможност тој да се регулира, аритмии, болки во грлото, бронхити, пневмонии се причини поради кои пациенти ги полнат амбулантитете на матичните лекари. Во меѓувреме продолжуваат да се шират и стомачните вируси.
-Имавме денови кога наутро и ноќе е студено, а преку ден е топло. Тоа предизвикува варијации во крвниот притисок кај многумина, а предизвикува и аритмии – објаснува д-р Драган Ѓорѓиевски, матичен лекар.
Од минатата недела, објаснува лекарот, има зголемен број на пациенти со болки во грлото, бронхити, пневмонии.
-Дел од граѓаните не се облекуваат соодветно. Исто така уште сме со намален имунитет поради маските кои ги носевме долго време. Во исто време продолжуваат да се шират стомачните вируси – објаснува д-р Ѓорѓиевски.
Тој советува граѓаните редовно да го следат крвниот притисок. Доколку почувствуваат стегање во гради, интензивни главоболки, силни вртоглавици, веднаш да се јават на лекар.
-Мојот совет е и здрава исхрана, хигиена кога станува збор за храната и редовно миење раце. Исто така треба да внимаваме да не се мешаме со оние кои се разболени со заразно заболување – додава докторот.
Според прогнозата на Управата за хидрометеоролошки работи во наредните денови следува период на стабилно време со постепен пораст на дневната температура. Н.Б.З.
