Владата денеска го усвои Предлог-буџетот за 2027 година, со кој ги поставуваме фискалните рамки и развојните приоритети за наредната година. Основната цел е да обезбедиме стабилни и одржливи јавни финансии, да продолжиме со постепена фискална консолидација, но истовремено да создадеме услови за економски раст, инвестиции и подобрување на животниот стандард на граѓаните – изјави денеска на прес-конференција во Владата министерката за финансии Гордана Димитриеска Кочоска.
Таа истакна дека Буџетот за 2027 година го подготвиле во услови на неизвесно меѓународно економско опкружување и екстерни ризици, поради што посебно внимание посветиле на реалноста на проекциите, одржливоста на расходите и ефикасното користење на јавните средства.
-Предлог Буџетот за 2027 година, вкупните приходи се планирани на ниво од 395,4 милијарди денари, што е 5,7 отсто повеќе споредено со 2026 година, додека вкупните расходи се проектирани на 440,4 милијарди денари, што е за 4,8 отсто споредено со 2026 година – рече министерката.
Таа посочи дека буџетскиот дефицит е планиран на 45 милијарди денари, односно 3,5 отсто од БДП, и е во согласност со Фискалната стратегија за периодот 2027–2031 година.
-Ова значи дека остануваме на определбата на постепена фискална консолидација, со јасна цел за намалување на буџетскиот дефицит и стабилизирање на јавниот долг, без притоа да се откажеме од развојните приоритети – рече министерката.
Таа подвлече дека особено значаен сегмент на Буџетот за 2027 година се капиталните инвестиции. -За капитални расходи се планирани 40,8 милијарди денари. Нашата определба е овие средства да бидат насочени кон проекти кои создаваат долгорочна вредност, ја подобруваат инфраструктурата и придонесуваат за поквалитетни јавни услуги – истакна таа.
На приходната страна, посочи Димитриеска Кочоска, даночните приходи се проектирани на 223,1 милијарди денари, што претставува раст од 6,4 проценти.
-Даночната политика ќе остане предвидлива, со фокус на унапредување на наплатата, намалување на даночната евазија и дигитализација на даночните процеси. Со Буџетот во 2027 обезбедуваме редовно и непречено финансирање на сите законски и договорни обврски на државата – истакна таа.
Министерката посочи дека со Буџетот се обезбедуваат средства за раст на плати во јавниот сектор, повеќе пари за исполнување на обврските што произлегуваат од членството на државата во НАТО, при што за одбраната се планирани средства во висина од 2 отсто од БДП за зајакнувањето на одбранбените капацитети, модернизацијата и опремувањето на Армијата.
Посебен приоритет, посочи таа, останува социјалната сигурност на граѓаните. Потенцира дека за социјални трансфери се предвидени 220,8 милијарди денари што е зголемување за 4,1 проценти, од кои 123,8 милијарди денари за исплата на пензии или раст за 4,8 проценти, согласно законското усогласување.
– За социјална заштита на најранливите категории граѓани се предвидени 14,3 милијарди денари, додека за активните политики и мерки за вработување се планирани 2,9 милијарди денари. За здравствена заштита се обезбедени 3,9 милијарди денари повеќе во споредба со оваа година. Исто така, за општините преку блок дотации и дотации за ДДВ се планирани трансфери во износ од околу 36 милијарди денари. Особено значаен сегмент на Буџетот за 2027 година се капиталните инвестиции. За капитални расходи се планирани 40,8 милијарди денари. Нашата определба е овие средства да бидат насочени кон проекти кои создаваат долгорочна вредност, ја подобруваат инфраструктурата и придонесуваат за поквалитетни јавни услуги. Притоа, не е важна само висината на планираните средства, туку и нивната реализација. Нашиот фокус е на навремено спроведување на проектите и на конкретни резултати на терен – рече Димитриеска Кочоска.
Таа напомена дека средствата за Јавното претпријатие за државни патишта веќе не се предвидени во Буџетот односно тие веќе ги обезбедува претпријатието.
Дополнително, појасни министерката, покрај капиталните инвестиции што директно се финансираат од Буџетот, во 2027 година продолжува реализацијата на значајни инфраструктурни проекти преку ЈПДП како што е Коридорот 8 и 10 Д и продолжува реализацијата и на проекти како што се автопатските делници Кичево–Букојчани, Кичево–Охрид и Скопје–Блаце, подобрувањето на локалната патна инфраструктура, како и проектите за изградба и модернизација на железничката инфраструктура, вклучително и источниот дел на Коридорот 8, железничкиот граничен премин Табановце.
– Дополнително, во 2027 година започнуваме со реализација на неколку нови значајни инвестициски проекти, меѓу кои се обновата на возниот парк на Железници– Транспорт, дополнителното финансирање за изградба на фискултурни сали, како и завршувањето на изградбата на објектите на Факултетот за информатички науки и компјутерско инженерство и изградбата на нов објект за потребите на Факултетот за физичко образование, спорт и здравје во Скопје. Во образованието продолжуваат инвестициите во реконструкција на студентските домови, изградба и реконструкција на училишта и спортски сали, како и развојот на инфраструктурата на Универзитетот „Св. Кирил и Методиј“ – истакна министерката и ги издвои проектите за основна дигитална инфраструктура на државата, енергетска ефикасност во јавниот сектор, модернизација на земјоделството, изградба и рехабилитација на системите за наводнување, како и инвестициите во енергетската инфраструктура и обновливите извори на енергија.
Таа посочи дека продолжува и реализацијата на проектите за локална инфраструктура, енергетска ефикасност на јавните објекти и воведување на брз автобуски превоз во Скопје. Сите овие инвестиции, нагласи, имаат една заедничка цел – подобра инфраструктура, поквалитетни јавни услуги, поголема продуктивност и создавање услови за развој на економијата.
– Во 2027 година, покрај финансирањето на буџетскиот дефицит кој е проектиран на 45 милијарди денари, државата има обврски и за сервисирање на долгот во износ од 124,6 милијарди денари. Од вкупните обврски за отплата 46,5 милјарди денари се за надворешен долг. Наредната година како што е познато за отплата е еврообрзницата од 500 милиони евра издадена во 2023 година. За финансирање на дефицитот и обврските планирано е домашно задолжување од 36,3 милијарди денари и дополнителни 60 милијарди денари за едногодишни државни хартии од вредност кои доспеваат за отплата и задолжување во странство од 86,8 милијарди денари. Нашиот пристап е навремено и одговорно управување со обврските, обезбедување средства за непречено финансирање на Буџетот и одржување на стабилноста на јавните финансии – рече Димитриеска Кочоска.
Нашата определба, истакна министерката, е да градиме Буџет заснован на реални приходи, одговорно управување со расходите и јасно утврдени приоритети.
– Во 2027 година продолжуваме со фискална дисциплина, ефикасно користење на јавните средства и посилен фокус на капиталните инвестиции. Целта е да обезбедиме стабилни финансии, да создадеме услови за одржлив економски раст и подобар животен стандард на граѓаните – додаде Димитриеска Кочоска, пренесува МИА.
