Фото: МЗШВ

На свеченост во Министерството за земјоделство, шумарство и водостопанство денеска беа доделени уверенија за завршена шестмесечна обука на 81 шумски полицаец и на еден заменик-командир.

Министерот Серафимовски посочи дека Шумската полиција се засилува со нов кадар на почетокот на грејната сезона, кога се очекува поголем притисок врз шумите.

Тој истакна дека со вклучувањето на новите полицајци, Шумската полиција ќе може да спроведува повеќе контроли за да ја спречи бесправната сеча и да открива случаи на превоз и продажба на дрва од незаконско потекло.

– Законот треба да важи подеднакво за секого, без оглед на името или функцијата. Држете се до фактите и постапувајте во рамките на своите законски овластувања. Ја имате целосната моја поддршка во борбата против криминалот со нашето шумско богатство – им порача министерот Серафимовски на новите припадници на Шумската полиција.