Флавио Болсонаро, поразениот претседателски кандидат во Бразил, во првото јавно обраќање по заминувањето од земјата се прогласи за „лидер на Бразил“ и најави дека од странство ќе продолжи да се бори против актуелниот претседател Луиз Инасио Лула да Силва.
Во објава на социјалната мрежа „Икс“, Болсонаро првично се нарекол „вистински избран претседател“, но подоцна ја изменил формулацијата во „лидер на Бразил“. Според медиумските извештаи, промената можеби била направена за да избегне дополнителни правни проблеми во Бразил.
Во своето обраќање, тој ги оспори изборните резултати, тврдејќи дека имало „одвратна изборна измама“ и дека победата на Лула била овозможена со поддршка на корумпираниот судски систем. Болсонаро најави дека од странство ќе ја предводи, како што ја опиша, борбата за демократија и ќе се обиде да го спречи воспоставувањето на „диктаторски режим“.
– Не избегав од Бразил. Заминав за доброто на Бразил – напиша тој, додавајќи дека против него нема налог за апсење и дека станува збор за политички мотивиран „лов на вештерки“. Болсонаро ги негира обвинувањата против него.
Флавио Болсонаро е сенатор и најстар син на поранешниот бразилски претседател Жаир Болсонаро, кој беше осуден на 27 години затвор за обид за државен удар.
Телевизиските снимки го прикажаа Флавио Болсонаро како пристигнува со приватен авион на аеродромот во Мајами, во придружба на сопругата Фернанда и ќерките Каролина и Луиза. Американскиот Стејт департмент претходно соопшти дека на Болсонаро и на членовите на неговото семејство ќе им бидат издадени визи за влез во САД.
Во обраќањето, тој им се заблагодари на аргентинскиот претседател Хавиер Милеи и на американскиот претседател Доналд Трамп. Според аргентинските имиграциски власти, Болсонаро отпатувал во Аргентина, од каде што со приватен авион продолжил кон Еквадор, а потоа, според достапните информации, заминал за Мајами.
Забраната за патување му била изречена во рамките на истрага за наводно перење пари, но тој ги негира обвиненијата.
Според официјалните изборни резултати наведени во извештаите, Болсонаро освоил 48,2 процента од гласовите во вториот круг, додека Лула добил 51,8 проценти. Десничарската партија на Болсонаро ја призна победата на Лула.
