Екстремната топлина и продолжената суша земаат данок врз популациите на ежови во делови од Велика Британија и Каналските Острови. Организациите за спасување на животните примаат сè повеќе сериозно дехидрирани и неухранети животни, а експертите од Џерси предупредуваат дека сегашната генерација на деца би можела да биде последната што ќе види жив еж во оваа област. Бројот на ежови оставени без своите мајки или пронајдени дехидрирани единки се зголемил за 30 проценти за време на топлотниот бран. Проблемот е особено изразен ова лето на југозападниот дел од Англија и Каналските Острови, каде што здруженијата за заштита на животните предупредуваат дека ежовите сè потешко наоѓаат храна и вода. Поради продолжената суша, почвата станала толку тврда што животните тешко можат да копаат и да ги дофатат инсектите со кои се хранат. Резултатот е зголемен број возрасни животни и младенчиња што се сериозно неухранети и дехидрирани.
Гил Морган од Групата за зачувување на ежовите од Џерси предупредува дека ова е трето последователно топло и суво лето во Џерси.
– Ако сме изгубиле три години без младенчиња, тоа значи дека оваа генерација на деца би можела да биде последната што ќе види жив еж во Џерси – изјави таа.
Таа објасни дека мајките ги хранат своите младенчиња во текот на првите четири недели од нивниот живот, но потоа, поради недостигот од храна и вода, тие повеќе немаат доволно резерви од енергија. Како резултат на тоа, спасувачите наоѓаат сериозно неухранети мајки и младенчиња.
Слична ситуација владее и во Корнвол. Здружението „Приклс енд Паус“ моментално се грижи за дури 129 ежа, додека Трејси Сарџент од „Портлевен Харбор хеџис рескју“ вели дека никогаш немало толку интензивна година. Ежовите во руралните средини се особено изложени на ризик.
Како да им се помогне на ежовите? На граѓаните им се советува да оставаат плитки садови со свежа вода во своите градини и да ги полнат наутро и навечер. На ежовите може да им се понудат мали суви бисквити за миленичиња како дополнителна храна. Експертите предупредуваат дека не треба да им се дава брашно, семки од сончоглед, кикирики или млеко. Ежовите не толерираат лактоза, па затоа млекото може да им наштети.
