ФУДБАЛ – СП 2026
- Репрезентацијата влезе во историјата со тоа што стана најмалата нација што стигнала до нокаут-фазата на СП
Награда за репрезентацијата што претставува група од 10 острови во Атлантски Океан ќе биде да се соочи со бранителот на титулата, Аргентина, во осминафиналето. Играчите се собраа околу мобилен телефон на теренот по ремито без голови со Саудиска Арабија за да ги гледаат последните моменти од победата на Шпанија над Уругвај – резултат што потврди дека тие завршија како второпласирани во групата Х.
– Солзи од гордост и радост околу трибините. Имаше прекрасен момент кога сите беа собрани околу своите телефони, чекајќи го свирежот за крај на натпреварот. Кога се случи, солзи течеа на теренот и на трибините. Каков момент на Светското првенство – викна коментаторот на „Би-би-си Радио 5“, Роб Ло, во Хјустон.
Тоа следуваше по неверојатното реми без голови во нивниот прв натпревар со Шпанија, каде што 40-годишниот голман Возиња беше херој, и по ремито 2-2 со двократниот победник на СП, Уругвај.
– Неверојатно е што прават, не беше само еден меч против Шпанија туку три натпревари на највисоко ниво – рече поранешниот победник на СП, Шпанецот Хуан Мата, за ИТВ.
Како нацијата со само 525.000 жители, која се квалификуваше пред петкратниот африкански шампион Камерун, стигна до тука?
ФАКТОРОТ НА ДИЈАСПОРАТА
Главната причина за успехот на „Сините ајкули“ е одлуката на Фудбалската федерација на Зелено`ртските Острови (ФКФ) да привлече играчи од дијаспората на земјата. Постојат силни врски со поранешната колонијална сила Португалија, со серија тешки суши минатиот век што предизвикаа голема емиграција од островите, додека поморската традиција и вклученоста во поморската трговија значат дека има значителна популација во Ротердам со корени од Зелено`ртските Острови.
Четиринаесет члена на нивниот состав од 26 играчи за СП се родени во странство, а шест од нив потекнуваат од холандскиот пристаништен град. Еден од нив, напаѓачот Даилон Ливраменто, кој лани играше за Каса Пија во португалската Прва лига, го постигна единствениот гол во нивната клучна квалификациска победа над Камерун во септември 2025 година.
– ФКФ постигна значителен напредок преку страст, посветеност и јасен технички план. Резултатите што ги гледаме во голема мера се производ на години постојана работа, силна верба и луѓе што го посветија своето срце на проектот – изјави за „Би-би-си Спорт Африка“, Јосина Фреитас Фортес, членка на парламентот на Зелено`ртските Острови.
Регрутирањето на централниот бек роден во Даблин, Роберто Лопес, преку веб-страницата за деловно вмрежување „Линкдин“ во 2019 година е добро раскажана приказна, додека поранешниот крилен играч на Манчестер јунајтед, Бебе, беше дел од нивниот состав за Африканскиот куп на нациите (АФКОН) во 2023 година откако ја претставуваше Португалија за играчи до 21 година.
– Во овој тим постои внатрешна доверба дека сме доволно добри за да се мешаме со најдобрите тимови во светот. Тоа не е нешто што е измислено од ништо. Откако сум вклучен, а и пред тоа, постои тековен план Зелено`ртските Острови да се качат на големата маса со големите фудбалски нации во светот – изјави Лопес.
СИЛА, ЕДИНСТВО, ОТПОРНОСТ
Голем дел од заслугите за настапите на Зелено`ртските Острови мора да му се припише на тренерот Бубиста (56), кој самиот е поранешен репрезентативец, а е на чело од јануари 2020 година. Стабилната тренерска поставеност му овозможи на поранешниот централен бек да изгради компактен и добро извежбан тим со организирана одбрана, технички играчи од средниот ред и надарени напаѓачи што ја изненадија Гана и ремизираа со Египет за време на четврт-финалето на Африканското првенство 2023, откако го имаа своето деби на турнирот само 10 години претходно. Можеби требаше да му се заблагодарат на голманскиот ветеран Возиња за седумте одбрани во ремито без голови со Шпанија, но нивната дисциплина беше нагласена од фактот дека „Сините ајкули“ направија само еден фаул против шампионите од 2010 година – најмалку забележани од репрезентација на натпревар на СП од 1966 година.
– Секогаш тренираме и играме како една единица, па затоа сѐ што направивме во играта не беше првпат. За нас, тоа е нашата игра. Така играме, ова сме ние. Ова е нашата личност како тим и како дефанзивци – изјави Сидни Лопес Кабрал за „Би-би-си Светски сервис“.
Зелено`ртските Острови имаа понапаѓачки и поекспанзивен пристап во нивниот втор настап во групата Х против Уругвај, но и ја демонстрираа својата челична решителност со израмнувачкиот гол во второто полувреме.
– Поважно од резултатот е да можеме да го покажеме нашиот идентитет како тим, сила, единство, а исто така и нашата отпорност – рече селекторот Бубиста.
Тој беше доби признание за неговото достигнување во обезбедувањето квалификации за СП со тоа што беше прогласен за тренер на годината на континентот за 2025 година од Конфедерацијата на африканскиот фудбал.
Тој отсекогаш верувал дека неговиот тим има потенцијал да се вклопи со светската елита.
– Се снајдовме добро со оглед на тоа колку е мала нашата земја. Мислам дека во иднина ќе бидеме на СП – изјави за „Би-би-си Спорт Африка“ пред Африканската конфедерација во 2021, кога „Сините ајкули“ стигнаа до осминафиналето, а тоа смело предвидување и се оствари.
НАГРАДА? АРГЕНТИНА ВО НОКАУТ-ФАЗАТА
Награда на Зелено`ртските Острови ќе биде да се соочат со Аргентина на Лионел Меси во Мајами во осминафиналето в петок.
– За нас, ништо не е невозможно. Од самиот почеток, рековме дека една од целите што ги имавме е да му ја покажеме нашата земја на остатокот од светот. Да можеме да играме против Аргентина и Меси во ваква фаза е одлично за нашата држава, без оглед на самиот натпревар – рече Бубиста на прес-конференција по ждрепката со Саудиска Арабија, облечен во знамето на својата земја.
Средниот играч Дерој Дуарте, именуван за играч на натпреварот против Саудиска Арабија, дополни: „Искрено, лудо е. Се чувствувам како да сум во сон. Прво, да прославиме. Многу сме среќни. Да се надеваме дека и сите жители на Зелено`ртските Острови ќе бидат среќни. Сега ќе се фокусираме на следниот натпревар против Аргентина. Тежок натпревар, но да веруваме. Сѐ e можно“.
Поранешниот тренер на Тотенхем, Нотингем Форест, Селтик и на Австралија, Анге Постекоглу, за ИТВ изјави: „Ова едноставно е одлична приказна за она што претставува Светско првенство. Често зборуваме за тоа како фудбалот допира до секој дел од светот и тоа е она што може да го направи. Тоа само ја дополнува нивната приказна. Играње против актуелниот шампион. Каква одлична приказна е тоа“.
Поранешниот дефанзивец на Англија и Манчестер Јунајтед, Гери Невил, додаде: „Мислам дека оние скептици што мислеа дека проширувањето на Светското првенство не е правилно можеби повторно размислуваат гледајќи ги овие навивачи на Зелено`ртските Острови, бидејќи ова е навистина посебно. Земја од 500.000 луѓе стигнува до нокаут-фазата. Го видовме Уругвај, една од најголемите земји, како си заминува, а потоа една од најмалите репрезентации како стигнува. Каков момент за нив“. Г.И.
Мексико, Франција и Аргентина со максимални три победи
Со натпреварите од шеснаесеттина финалето започна елиминациската фаза на Светското првенство (СП) во фудбал, откако претходно завршија дуелите по групи, во кои само репрезентациите на Мексико (група А), Франција (група И) и на Аргентина (група Ј) забележаа максимални три победи, односно освоија по девет бода. Од мечевите што допрва следуваат се очекува да има многу возбудувања и неизвесност, а особено на дуелите: Португалија – Хрватска, Холандија – Мароко, Франција – Шведска, САД – Босна… Нокаут-фазата започна вчера со натпреварот Канада – Јужна Африка, кој беше закажан во Инглвуд, во близината на Лос Анџелес.
Австрија за првпат ја мина групната фаза на СП по пауза од 44 години. Тоа СП во 1982 година се играше во Шпанија, а токму Шпанија ќе биде следен противник на Австријците на СП 2026. Конго, пак, стана единаесетта различна африканска држава што стигнала до нокаут-фаза од едно СП, петта на која тоа ѝ успеало токму на ова СП, заедно со Јужна Африка, Египет, Брегот на Слоновата Коска и Зелено`ртските Острови.
Осум најдобропласирани трети селекции
1. ДР Конго 4 бода
2. Шведска 4
3. Гана 4
4. Еквадор 4
5. БиХ 4
6. Алжир 4
7. Парагвај 4
8. Сенегал 3
Двојки, нокаут-фаза
Јужна Африка – Канада вчера
Денеска
Бразил – Јапонија 19 ч.
Германија – Парагвај 22.30 ч.
Утре
Холандија – Мароко 3 ч.
БСК – Норвешка 19 ч.
Франција – Шведска 23 ч.
Среда
Мексико – Еквадор 3 ч.
Англија – ДР Конго 18 ч.
Белгија – Сенегал 22 ч.
Четврток
САД – БиХ 2 ч.
Шпанија – Австрија 21 ч.
Петок
Португалија – Хрватска 1 ч.
Швајцарија – Алжир 5 ч.
Австралија – Египет 20 ч.
Сабота
Аргентина – Зелено’ртски О. на полноќ
Колумбија – Гана 3 ч.
СП 2026, РЕЗУЛТАТИ, ТАБЕЛИ, ДВОЈКИ
Група А: Мексико – Јужна Африка 2-0, Јужна Кореја – Чешка 2-1, Чешка – Јужна Африка 1-1, Мексико – Јужна Кореја 1-0, Чешка – Мексико 0-3, Ј. Африка – Ј. Кореја 1-0. Табела: Мексико 9, Африка 4, Ј. Кореја 3, Чешка 1.
Група Б: Канада – БиХ 1-1, Катар – Швајцарија 1-1, Швајцарија – БиХ 4-1, Канада – Катар 6-0, Швајцарија – Канада 2-1, БиХ – Катар 3-1. Табела: Швајцарија 7, Канада 4, БиХ 4, Катар 1.
Група Ц: Бразил – Мароко 1-1, Хаити – Шкотска 0-1, Шкотска – Мароко 0-1, Бразил – Хаити 3-0, Мароко – Хаити 4-2, Шкотска – Бразил 0-3. Табела: Бразил 7, Мароко 7, Шкотска 3, Хаити 0.
Група Д: САД – Парагвај 4-1, Австралија – Турција 2-0, САД – Австралија 2-0, Турција – Парагвај 0-1, Турција – САД 3-2, Парагвај – Австралија 0-0. Табела: САД 6, Австралија 4, Парагвај 4, Турција 3.
Група Е: Германија – Курасао 7-1, Брегот на Слоновата Коска (БСК) – Еквадор 1-0, Германија – БСК 2-1, Еквадор – Курасао 0-0, Курасао – БСК 0-2, Еквадор – Германија 2-1.Табела: Германија 6, БСК 6, Еквадор 4, Курасао 1.
Група Ф: Холандија – Јапонија 2-2, Шведска – Тунис 5-1, Холандија – Шведска 5-1, Тунис – Јапонија 0-4, Тунис – Холандија 1-3, Јапонија – Шведска 1-1. Табела: Холандија 7, Јапонија 5, Шведска 4, Тунис 0.
Група Г: Белгија – Египет 1-1, Иран – Нов Зеланд 2-2, Белгија – Иран 0-0, Нов Зеланд – Египет 1-3. Нов Зеланд – Белгија 1-5, Египет – Иран 1-1. Табела: Белгија 5, Египет 5, Иран 3, Нов Зеланд 1.
Група Х: Шпанија – Зелено`ртски О. 0-0, С. Арабија – Уругвај 1-1, Шпанија – С. Арабија 4-0, Уругвај – Зелено`ртски О. 2-2, Зелено`ртски О. – С. Арабија 0-0, Уругвај – Шпанија 0-1. Табела: Шпанија 7, Зелено`ртски О. 3, Уругвај 2, С. Арабија 2.
Група И: Франција – Сенегал 3-1, Ирак – Норвешка 1-4, Франција – Ирак 3-0, Норвешка – Сенегал 3-2, Норвешка – Франција 1-4, Сенегал – Ирак 5-0. Табела: Франција 9, Норвешка 6, Сенегал 3, Ирак 0.
Група Ј: Аргентина – Алжир 3-0, Австрија – Јордан 3-1, Аргентина – Австрија 2-0, Јордан – Алжир 1-2, Алжир – Австрија 3-3, Јордан – Аргентина 1-3. Табела: Аргентина 9, Австрија 4, Алжир 4, Јордан 0.
Група К: Португалија – ДР Конго 1-1, Узбекистан – Колумбија 1-3, Португалија – Узбекистан 5-0, Колумбија – ДР Конго 1-0, Колумбија – Португалија 0-0, ДР Конго – Узбекистан 3-1. Табела: Колумбија 7, Португалија 5, ДР Конго 4, Узбекистан 0.
Група Л: Англија – Хрватска 4-2, Гана – Панама 1-0, Англија – Гана 0-0, Панама – Хрватска 0-1, Панама – Англија 0-2, Хрватска – Гана 2-1. Табела: Англија 7, Хрватска 6, Гана 4, Панама 0.
