Литературно катче
- Минатата седмица беа доделени наградите од конкурсот на темата „Мојот посакуван летен распуст“, распишан од Домот за деца и млади „Благој Мучето“ од Струмица. На конкурсот пристигнале голем број творби од основните училишта од Струмица и од регионот. Со вас ги споделуваме првонаградените творби на ученичките Стефанија Зимбакова и Вероника Младенова, во категоријата од 6 до 9 одделение
Летото отсекогаш имало посебно место во моето срце. Тоа не е само годишно време исполнето со сонце и топли денови, туку период кога светот изгледа поубаво, помирно и посреќно. Во летото има некаква магија што не може лесно да се опише со зборови. Мирисот на топол воздух, звукот на детска смеа, долгите вечери под ѕвезденото небо и чувството на слобода прават човек да се чувствува живо и исполнето. За мене летниот распуст не претставува само пауза од училишните обврски. Тоа е време кога човекот има можност повеќе да ужива во животот, да создава нови спомени, да поминува време со саканите луѓе и да прави работи што му го исполнуваат срцето. Летото е период во кој секој ден носи нова приказна, нова насмевка и нова причина за среќа.
Мојот посакуван летен распуст би бил исполнет со убави моменти, искрени емоции и незаборавни доживувања. Би сакала секое утро да започнува мирно, со сончеви зраци што ја осветлуваат собата и со чувство дека пред мене е уште еден прекрасен ден. Утрото има посебна убавина во лето, воздухот е свеж, а природата изгледа како да е полна со живот. Една од моите најголеми желби е дел од летниот распуст да го поминам покрај море. Морето за мене претставува место каде што душата се смирува.
Би уживала додека одам босонога во песокот и ги слушам брановите што нежно удираат во брегот. Би пливала во чистата сина вода, би го чувствувала топлото сонце на лицето и би ги гледала најубавите зајдисонца што го бојат небото во портокалови и розови нијанси. Навечер би седела покрај морето и би го гледала небото полно со ѕвезди. Во тие тивки моменти човек почнува повеќе да размислува за животот, за соништата и за луѓето што ги сака. Понекогаш токму најтивките мигови оставаат најголема трага во срцето. Мојот посакуван летен распуст не би бил исполнет само со патувања туку и со време поминато со луѓето што ми значат. Би сакала долги летни вечери исполнети со смеа, разговори и убави спомени. Со другарите би шетале низ градот, би јаделе сладолед, би правеле фотографии и би се смееле на најмали работи.
Токму тие едноставни моменти најмногу се паметат затоа што се искрени и полни со радост. Освен дружењето и одморот, би сакала дел од летото да го поминам волонтирајќи во Црвен крст. Сметам дека летото е вистинско време човек да направи нешто добро и корисно за другите. Би сакала да се вклучам во хуманитарни акции, да учествувам во активности со кои ќе им се помогне на луѓето на кои им е потребна поддршка и да бидам дел од нешто што шири добрина и хуманост. Верувам дека најубавото чувство е кога знаеш дека некому си му помогнал или си му го разубавил денот. Една насмевка, еден убав збор или едно добро дело можат многу да значат. Волонтирањето би ме направило посреќна, но и побогата како личност затоа што би научила колку е важно да бидеме луѓе со големо срце. Во мојот совршен летен распуст би имало и време за мир и размислување. Би читала книги, би слушала музика и би ги поминувала ноќните часови гледајќи во небото. Понекогаш човек има потреба само од тишина и мир за да сфати колку е убав животот. Би сакала да уживам во секој мал момент, мирисот на летото, звукот на ветерот, топлите вечери и чувството дека времето поминува побавно и помирно. Би сакала да посетам и нови места, да видам различни градови и да запознаам нови луѓе. Секое патување носи нови искуства и приказни. Би собирала спомени наместо предмети затоа што спомените остануваат засекогаш. За мене летниот распуст е време кога човек најмногу чувствува среќа во малите нешта. Тоа се моменти што можеби изгледаат обично, но еден ден стануваат најубавите спомени. Летото нѐ учи повеќе да се смееме, повеќе да сакаме и повеќе да уживаме во животот.
Летото за мене претставува време кога душата се одмора, а срцето се исполнува со радост и спокој. Тоа се денови кога малите нешта стануваат најважни, долгите прошетки во топлите вечери, смеата со другарите, мирисот на морето и чувството дека секој миг вреди да се запамети. Во мојот посакуван летен распуст би имало многу искрени насмевки, нови доживувања и моменти што би ги раскажувала со години. Би сакала ова лето да научам нови работи, да стекнам нови пријателства и да почувствувам дека секој ден носи нова убавина. За мене совршениот летен распуст не е исполнет со скапи работи, туку со моменти што оставаат трага во срцето. Тоа се ноќите поминати под ѕвездено небо, разговорите што траат со часови, искрените прегратки и чувството дека си опкружен со луѓе што те прават среќен. Би сакала да патувам, да посетам нови места и да создадам спомени што засекогаш ќе ме потсетуваат на убавината на младоста и безгрижните летни денови. Верувам дека токму летото нѐ учи повеќе да уживаме во животот, да бидеме благодарни за малите нешта и да ја пронаоѓаме среќата во секој миг.
Авторка: Стефанија Зимбакова, IX одд.
ООУ „Видое Подгорец“ – Струмица
Менторка: Фросина Милева
Летен распуст од соништата
Последното ѕвонче силно ѕвони,
во срцето радост се крие и гори.
Книгите веќе ги тргнав настрана,
летото наликува на убава бајка рана.
Сонцето топло над море што сјае,
секој ден дава нова среќа која трае.
Брановите тивки на брегот спијат,
а грижите човечки далеку се кријат.
Со друштво до доцна сакам да шетам,
низ град весело, гласно, сакам да пеам.
Смеа, музика и летни магични сни,
најубави би ми биле тие спокојни дни.
Без учење, книги и тетратки стари,
само сонце, море и прошетки кратки.
Сол во косите под тивок сончев блесок,
среќа и радост на врелиот песок.
„Ете таков распуст летен посакувам јас!“,
со отворени очи, силно, извикувам на глас!
Спомените топли в срце да ги чувам,
ко скапоцен камен, никогаш да не ги изгубам.
Авторка: Вероника Младенова,
IX одделение ООУ,, Мануш Турновски “ – Ново Село
Менторка: Надица М. Ангелова
