Неверојатно откритие од природниот свет
Добро е познато дека рибите можат да дишат под вода, но и други животни можат да преживеат во неа кратко време со задржување на здивот или „дишење“ низ кожата. Научниците сосема случајно открија дека матиците можат да преживеат под вода. Коавторката на студијата Сабин Рондо случајно ја открила оваа способност на пчелите додека ги проучувала ефектите на пестицидите врз бумбарите. Таа ги ставила во епрувети исполнети со земја во фрижидер, но кога ги извадила епруветите открила дека водата во некои од нив се кондензирала и преплавила четири бумбари. И покрај тоа што биле целосно под вода, тие биле живи. Кога го повторила експериментот во студија во 2024 година, таа потврдила дека матиците можат да преживеат под вода дури и една недела.
Новото истражување се фокусираше на механизмот за преживување на пчелите во вода. Научниците земале здрави матици и кај нив предизвикувале дијапауза така што ги ставале во зимски услови (ладен и темен фрижидер). По неколку недели ги префрлале во комори полни со вода, а некои од пчелите поминувале само неколку часа под вода, додека други поминувале до една недела. За време на експериментот научниците внимателно ја следеле состојбата на нивниот метаболизам и ги евидентирале физиолошките промени. Тие откриле дека пчелите продолжиле да произведуваат јаглерод диоксид, што е доказ дека дишат под вода. Покрај тоа, тие се потпирале на анаеробниот енергетски систем, што довело до акумулација на лактат во телото.
Интересно е тоа што кога пчелите биле извадени од поплавените комори, тие веднаш почнале да закрепнуваат. Нивниот метаболизам станал исклучително активен и започнало отстранувањето на лактатот од нивните тела.
– Таквиот физиолошки капацитет ја поткрепува отпорноста на пчелите на екстремни услови во животната средина и може да биде од клучно значење, особено поради променливите модели на пролетни поплави – напишаа авторите во трудот.
Со оглед на тоа што се исклучително чувствителни на климатските промени, оваа можност покажува како тие сè уште можат да се приспособат на екстремни услови и да преживеат.
