Претседателката Гордана Силјановска-Давкова денеска во Истанбул оствари билатерална средба со претседателот на Турција Реџеп Таип Ердоган, на која беше констатирано дека односите меѓу двете земји се карактеризираат со силно пријателство, доверба и континуирана поддршка.
Од нејзиниот кабинет информираат дека на почетокот од средбата Силјановска-Давкова изразила сочувство за жртвите во вчерашното пукање во училиште во Турција, посакувајќи брзо закрепнување на повредените.
Таа нагласила дека Турција е близок партнер на Македонија и дека редовно покажува солидарност во тешки моменти, вклучително и при трагедии во земјата.
На средбата било истакнато дека турските институции и компании имаат значајно присуство во Македонија преку проекти и активности на ТИКА, образовната мрежа „Маариф“, културниот центар „Јунус Емре“, како и компании како „Туркиш ерлајнс“ и „Халкбанк“.
Двајцата претседатели се согласиле дека постои потенцијал за дополнително унапредување на економската соработка, зголемување на трговската размена и инвестициите, особено преку претстојниот бизнис-форум.
Разговарано било и за статусот на турската заедница во Македонија, како и за нејзината застапеност во институциите и образовниот систем.
Силјановска-Давкова ја поздравила турската иницијатива „Балканска мировна платформа“, оценувајќи ја како важен механизам за регионален дијалог и стабилност.
На крајот од средбата, таа упатила покана до претседателот Ердоган за официјална посета на Македонија.
Претседателката престојува во Турција по повод учеството на петтиот Дипломатски форум во Анталија.
