Министерствата за земјоделство, шумарство и водостопанство и за економија и труд заеднички прават скрининг на увозниците на вештачки ѓубрива, информираше денеска министерот за земјоделството, шумарство и водостопанство, Цветан Трипуновски кој денеска одговараше на новинарски прашања пред отварањето на Меѓународно научно-стручно советување „Агро-наука и пракса 2026“(АНП-2026) на Земјоделскиот факултет при Универзитетот „Гоце Делчев“-Штип.
Трипуновски најави дека на утрешниот заеднички состанок се очекува да се донесат мерки кои ќе го превенираат ценовниот шок, бидејќи има зголемување на цената на вештачките ѓубрива. Скринингот е во делот на тоа по која цена се увезени вештачките ѓубрива и колкава е маржата која што ја имаат употребено во делот на продажбата.
– Веќе во текот на утрешниот ден е закажан состанок со увозниците на вештачки ѓубрива во нашата држава, во Министерството за земјоделство, на кој што ќе присуствуваат и претставници од Министерството за економија, да ја согледаме сондажата од терен, која што е пристигната од Пазарниот инспекторат и спрема тие параметри кои што ќе бидат внатре на еден заеднички состанок ќе донесеме некои конкретни мерки, како ќе се делува во делот на евентуално превенирање на ценовниот шок, во делот на употребата на вештачките ѓубрива – рече Трипуновски, пренесе МИА.
На прашањето дали сточарите ги добија сите субвенции, Трипуновски со одговор дека во делот на исплатата на субвенциите секогаш има дополнителни контроли и тоа, како што рече, во делот на тоа што значи исправност на самите апликации.
-Субвенциите кои што досега се исплатени се преку 35 милиони евра, за повеќе земјоделски категории и така ќе продолжи во наредниот период. Повторувам оние кои што биле во дополнителна контрола, по завршување на самиот процес ако е исправна апликацијата, ако е контролата во ред, нормално ќе им се исплати на тие земјоделци – рече Трипуновски кој денеска одговараше на новинарски прашања пред отварањето на научното стручно советување „Агро-наука и пракса 2026“ во Штип.
