Привремената влада предводена од премиерот Андреј Ѓуров официјално ја презеде функцијата. По положувањето заклетва во Народното собрание, во Советот на министрите беше одржана церемонија на примопредавање на власта.
На свеченоста, поранешниот премиер Росен Жељазков истакна: „Историјата веројатно не ги памети оние што имале гласни титули и функции, но секогаш ги памети оние што донесувале одлуки кога требало да се донесат“, пренесе МИА
Жељазков им се обрати на министрите од претходниот кабинет и им се заблагодари што донеле „ одлуки кога требало да се донесат, а не биле лесни“.
-Вие сте разумна и мудра личност и сигурен сум дека вие и вашите колеги ќе можете да го разликувате доброто што е направено од она што не е направено и може да се направи, како и да ги исправите грешките што ќе ги идентификувате – му рече Жељазков на новиот премиер Ѓуров.
– Нашата привремена влада нема да работи со реваншизам, туку со правила – рече привремениот премиер.
Ѓуров истакна дека работата на привремената влада нема да биде да суди, туку да постигне неколку цели. Најважната цел, истакна вршителот на должноста премиер, е да се врати довербата кај луѓето.
Според Ѓуров, општеството покажало „демократски инстинкт за зачувување“. Иако демократијата понекогаш е бучна и болна, таа им овозможува на луѓето да донесат промена на власта преку своите гласови без превирања за државата.
Претходно денеска, претседателката Јотова потпиша декрети за назначување на вршител на должноста влада и закажување избори за Народното собрание на 19 април. Гласањето ќе биде осмо од 2021 година.
Поранешниот премиер Росен Жељазков и единаесет министри од неговиот кабинет се враќаат во парламентот како пратеници. Тие беа дел од 51-то Народно собрание пред да бидат избрани во извршната власт.
Претседателката на Народното собрание, Раја Назарјан, објави дека поради назначувањето и инаугурацијата на техничката влада, вратени се акредитациите како пратеници на Росен Жељазков, Томислав Дончев, Атанас Зафиров, Даниел Митов, Георг Георгиев, Георги Георгиев, Красимир Валчев, Жечо Станков, Иван Иванов, Борислав Гуцанов, Манол Генов и Силви Кирилов, а прекинати се акредитациите на оние што ги заменуваа во парламентот за времето додека беа дел од редовната влада.
