Албанија е на прво место меѓу земјите од Западен Балкан по процентот на граѓани кои престојуваат во странство подолг временски период, иако е забележан пад во 2024 година.
Според истражувањето на Советот за регионална соработка (RCC), 34,7 отсто од анкетираните албански граѓани изјавиле дека живееле надвор од Албанија повеќе од три месеци, бројка повисока од онаа на другите земји во регионот, под влијание на традицијата на емиграција и сезонска работа.
– Сепак, податоците покажуваат дека мнозинството граѓани на Западен Балкан претпочитаат да останат во своите земји. Околу 68–71 отсто од испитаниците велат дека немаат планови да заминат, а Косово е на чело во 2025 година, со над 80 отсто од населението кое не сака да емигрира. Во Албанија, околу 70 отсто од граѓаните велат дека немаат намера да се преселат во странство, тренд сличен на оној во Србија и Северна Македонија – објавија албанските медиуми.
Од друга страна, според истражувањето, значителен дел од населението изразува интерес или неизвесност за емиграцијата во иднина.
Граѓаните на Босна и Херцеговина и на Црна Гора бележат високи нивоа на оваа група, додека албанските граѓани покажуваат поголем интерес за САД, Италија и Грција. Косово се издвојува по својата преференција за Швајцарија, додека Германија и Австрија остануваат привлечни дестинации за граѓаните на Северна Македонија и Босна и Херцеговина, што ги одразува традиционалните модели на миграција во регионот.
