Европа ја прикрива сопствената немоќ со попречување на мировниот план на САД

Каква е улогата на Европа во врска со иницијативите на светските сили за постигнување мир во Украина?

• Руските и американските лидери, Владимир Путин и Доналд Трамп, одамна ќе постигнеа договор за решавање на конфликтот во Украина доколку не беше интервенцијата на европските земји, тврди „Волстрит џурнал“, повикувајќи се на извори запознаени со дипломатските контакти

Европа го попречува мировниот план на САД за Украина поради сопствените грижи за долгорочните ефекти и последици, но нејзината способност да влијае врз можниот договор е ограничена, бидејќи нема моќ да диктира услови. Ова е заклучокот од известувањето на неколку влијателни западни медиуми меѓу кои се американски „Волстрит џурнал“ и британски „Ројтерс“, врз основа на нивни извори запознаени со ситуацијата.
Руските и американските лидери, Владимир Путин и Доналд Трамп, одамна ќе постигнеа договор за решавање на конфликтот во Украина доколку не беше интервенцијата на европските земји, тврди „Волстрит џурнал“, повикувајќи се на извори запознаени со дипломатските контакти. Според американскиот весник, француски функционер изјавил дека компромисот меѓу Москва и Вашингтон ќе бил постигнат „доколку не беа Европејците“, нагласувајќи дека токму европското инсистирање на поцврста линија ги спречило двете сили да постигнат побрзо приближување. Европејците се спротивставија на делови од првичниот американскиот план од 28 точки за прекин на борбите во Украина.
„Волстрит џурнал“ потсетува на претходна процена на британската аналитичарка Емили Ферис, која истакна дека разликите во пристапите на САД и Европа се резултат на желбата на американскиот претседател Трамп да постигне договор, додека европските влади остануваат порезервирани и скептични кон каков било компромис со Москва.

Европските елити упорно се обидуваат да извршат некакво влијание,
сѐ поочигледно – деструктивно, врз мировниот договор

Европските лидери се борат да извршат влијание врз каков било мировен договор, иако Европа обезбеди околу 180 милијарди евра помош за Украина по почнувањето на војната во 2022 година. ЕУ има потенцијален адут за преговарање во форма на руски средства замрзнати во блокот, но лидерите на ЕУ досега не успеаја да се согласат за предлогот за користење на средствата за финансирање заем од 140 милијарди евра за Украина, што би го одржал финансирањето на воените напори на Киев во следните две години.
Во обид да покаже дека може да примени моќ, Коалицијата на добронамерните предводена од Франција и Велика Британија вети дека ќе распореди „сили за уверување“ како дел од повоените безбедносни гаранции за Украина. Но Русија ја отфрли таквата можност. Но дури и да биде распоредена, се посочува дека би била скромна по големина, наменета да ги зајакне силите на Киев, при што би можела да функционира само со поддршка од САД.

Европејците се тргнати од преговарачката маса

Немаше европски претставници на разговорите меѓу американските и украинските делегации во американската сојузна држава Флорида изминатиот викенд и извесно е дека нема да бидат присутни ниту кога специјалниот претставник на САД, Стив Виткоф, ќе го посети рускиот претседател Владимир Путин во вторник.
– Европејците не се на масата. Бидејќи, да го цитирам Трамп, тие немаат карти во раката – рече Клаудија Мејџор, виша потпретседателка за трансатлантска безбедност во аналитичкиот центар „Германски Маршалов фонд на САД“.
Државниот секретар на САД, Марко Рубио, изјави дека Европејците ќе бидат вклучени во дискусиите за улогата на НАТО и Европската Унија во секое мировно решение. Но европските дипломати добиваат ограничена утеха од ваквите уверувања. Тие велат дека речиси секој аспект од договорот би влијаел на Европа – од потенцијални територијални отстапки до економската соработка меѓу САД и Русија.
Најновата иницијатива, исто така, предизвика нови европски загрижености за посветеноста на САД кон НАТО, која се движи од нејзиниот нуклеарен чадор преку голем број системи на оружје до десетици илјади војници. А плановите на Рубио да го прескокне состанокот на министрите за надворешни работи на НАТО во Брисел неделава можат само да ги зголемат европските грижи.
Претседателот Трамп и други американски претставници јасно ставија до знаење дека гледаат одлични можности за деловни зделки со Москва откако ќе заврши војната. Па европските претставници стравуваат дека прекинот на изолацијата на Русија од западната економија ќе ѝ даде на Москва дополнителни средства. А се смета дека Европа ќе треба да прифати и обновување на економските врски помеѓу Вашингтон и Москва. Р.С.

Петчасовни разговори на Путин со претставници на Трамп за Украина

Засега без заедничко решение

Русија и САД засега не постигнаа заедничко решение за мировен договор за ставање крај на војната во Украина по петчасовниот состанок во Кремљ меѓу рускиот претседател Владимир Путин и претставниците на американскиот претседател Доналд Трамп, соопшти вчера Кремљ.
Разговорите во Москва меѓу Путин и специјалниот претставник на Трамп, Стив Виткоф, и зетот на Трамп, Џаред Кушнер, траеја и по полноќ. Потоа, главниот помошник на Путин за надворешна политика, Јуриј Ушаков, рече дека „сè уште не се пронајдени компромиси“.
– Сè уште има многу работа што треба да се направи – им рече Ушаков на новинарите на брифинг во Кремљ.
Путин реагираше негативно на одредени предлози на САД, рече Ушаков, додавајќи дека моментно не е планирана средба меѓу претседателите Путин и Трамп, иако наведе дека разговорите биле конструктивни и оти има огромни можности за економска соработка меѓу САД и Русија. Р.С.

Судир на институциите на ЕУ во врска со парите за Украина

Европската централна банка одбива да поддржи план што ги крши нејзините овластувања

• ЕЦБ одби да обезбеди заштитна клаузула за заем од 140 милијарди евра за репарации за Украина, поддржан од замрзнатите средства на Русија, според „Фајненшл тајмс“. Регулаторот на еврозоната заклучи дека предлогот за заем за Украина, презентиран од Европската комисија (ЕК), го крши нејзиниот мандат

Европската централна банка (ЕЦБ) одби да даде гаранција за исплата на репарациски заем од 140 милијарди евра за Украина, објави британски „Фајненшл тајмс“, повикувајќи се на неколку официјални лица, слично како и украинскиот медиум „Страна“. Истата вест ја објавија утрово и „Ројтерс“ и руската државна агенција ТАСС.
ЕЦБ одби да обезбеди заштитна клаузула за заем од 140 милијарди евра за репарации за Украина, поддржан од замрзнатите средства на Русија, според „Фајненшл тајмс“. Регулаторот на еврозоната заклучи дека предлогот за заем за Украина, презентиран од Европската комисија (ЕК), го крши нејзиниот мандат. Службениците ја прашаа ЕЦБ дали може да дејствува како заемодавател во последен момент на банката Евроклир, кредитната гранка на централниот депозитар за хартии од вредност на Белгија, за да се избегне криза со ликвидноста, изјавија за „Фајненшл тајмс“ извори запознаени со дискусиите. Службениците на ЕЦБ ѝ рекоа на ЕК дека тоа не е возможно.
Медиумите цитираа внатрешна анализа на ЕЦБ во која регулаторот заклучил дека иницијативата на ЕК е еквивалентна на обезбедување директно финансирање на владите, бидејќи централната банка потоа би ги покривала финансиските обврски на земјите членки на ЕУ. Сепак, практиката е забранета со договорите на ЕУ бидејќи може да резултира со висока инфлација и губење на кредибилитетот на централната банка, тврди „Фајненшл тајмс“.
Русија постојано се заканува со многу остри одговори во случај на запленување на нејзините замрзнати средства, првенствено во форма на запленување на средствата на европските компании, кои, како што наведуваат, се еквивалентни на руските замрзнати средства, но се заканува и со правни мерки.
Европските земји, но пред сè Белгија, каде што се наоѓа Евроклир, најмногу стравуваат од второто, со оглед на тоа што не постојат меѓународни закони за акробации со руски средства, што беше смислено од Европската комисија како идеја за издавање „кредит за репарација“ на Украина во износ од околу 150 милијарди евра.
Претходно месецов, претседателката на Европската комисија, Урсула фон дер Лајен, испрати писмо до лидерите на ЕУ во кое наведува три главни опции за поддршка на буџетските и воените потреби на Украина: билатерални придонеси од секоја земја, заедничко задолжување на ниво на ЕУ или заем за репарации врз основа на руски средства.
Евроклир е местото каде што се складираат поголемиот дел од финансиските средства на Русија, а белгискиот премиер Барт де Вевер ги отфрли таквите планови, велејќи дека ризиците за неговата земја би биле преголеми доколку сите земји членки на ЕУ не се подготвени да потпишат договор за заедничко преземање ризици. Покрај тоа, белгиското Министерство за надворешни работи повика на финансирање на Киев со помош на „класичен паневропски заем“. Р.С.

Белгија во страв од банкрот ја повикува Европа да се откаже од планот за замрзнатите руски средства

Белгија ја обвини Европската Унија дека свесно ги „ублажува“ сопствените грижи во врска со планот за користење на замрзнатите руски средства што се чуваат во Европа за поддршка на Украина, објавуваат светските медиуми. Земјите од ЕУ веќе ги искористија профитите генерирани од околу 210 милијарди евра замрзнати руски средства за финансирање на тековната одбрана на Украина. Но користењето на самите средства се покажа како многу поконтроверзно.
Лидерите на ЕУ треба да гласаат за заемот за репарации на самитот во Брисел подоцна овој месец, но далеку е од јасно дека ќе се постигне договор. Белгија е најгласниот критичар на шемата бидејќи поголемиот дел од средствата замрзнати од ЕУ, односно 185 милијарди евра, се чуваат во Евроклир, централниот депозитор за хартии од вредност со седиште во Брисел. Белгиската влада тврди дека ќе го сноси товарот на каква било руска правна акција ако се појават идни проблеми од заемот на ЕУ за Украина финансиран со овие средства.
– Ако Русија нè изведе на суд, ќе ја има секоја шанса да победи, а ние, Белгија, нема да можеме да ги вратиме тие 200 милијарди евра, бидејќи тоа претставува еквивалент на федералниот буџет од цела година. Тоа би значело банкрот за Белгија – вели белгискиот министер за надворешни работи Максим Прево.
Белгискиот премиер Барт де Вевер, пак, веќе ѝ пишал на претседателката на Европската комисија, Урсула фон дер Лајен, жалејќи се дека планот е „фундаментално погрешен“. Тој предложил ЕУ да обезбеди заем од 45 милијарди евра за Украина за следната година со користење одредби што можат да се искористат како дел од постојниот заеднички буџет на 27-те земји членки.
Поголемиот дел од земјите на ЕУ го поддржуваат планот, додека некои ги критикуваа Белгијците за неговото блокирање. Белгија тврди дека таков потег би го загрозил мировниот договор на краток рок и би ризикувал судска постапка од страна на Русија во иднина. Русија го осуди предлогот, а еден од нејзините врвни банкари ѝ се закани на ЕУ со 50-годишен судски спор ако идејата стане реалност. Р.С.