Предизвиците на новите технологии
Спроведената студија покажа дека лекарите што наведуваат дека користат вештачка интелигенција во својата работа се перципираат како помалку компетентни, помалку сигурни и помалку емпатични. Ова важи и за случаи каде што вештачката интелигенција не се користела за дијагностички или терапевтски цели, туку само за административни задачи. Податоците се добиени откако учесниците, 1.276 возрасни лица од Соединетите Американски Држави, прегледале реклами за медицински ординации и оцениле различни карактеристики на прикажаните лекари, според студијата објавена во научното списание ЈАМА.
Рекламите се разликуваа само во еден аспект – изјава што укажува дека лекарот користи вештачка интелигенција за административни, дијагностички или терапевтски цели. На контролната група ѝ беше прикажана истата реклама без никакво споменување на вештачката интелигенција. Авторите на студијата, Мориц Рајс и Вилфрид Кунде од Универзитетот во Вирцбург и Флоријан Рајс од Институтот за медицинска информатика на Универзитетската болница „Шарите“ во Берлин, се сомневаат дека една од причините за негативната перцепција може да биде стравот дека лекарите слепо ќе ги следат препораките на вештачката интелигенција. Како и во многу други области, вештачката интелигенција игра сè поважна улога во модерната медицина. Сепак, научниците забележале дека односот на доверба меѓу пациентот и лекарот е клучен за успешен третман.
– Кога лекарите ги информираат своите пациенти за употребата на вештачка интелигенција, тие треба да се стремат да се справат со потенцијалните проблеми и да ги истакнат можните придобивки – сумираа авторите во заедничка изјава.
Лекарите, на пример, би можеле да имаат повеќе време за своите пациенти ако дел од административното работно оптоварување го извршува вештачката интелигенција.
– И покрај постојано растечката технологизација, вештачката интелигенција би можела дури и да го направи нашиот здравствен систем похуман на овој начин – се вели во соопштението за медиумите.
