Дефинитивно можеме да кажеме дека ова Светско првенство за клубови беше огромен, огромен, огромен успех од сите различни гледни точки, рече Инфантино, претседател на ФИФА
КЛУПСКО СП 2025
Клупското Светско првенство (СП) почна златна ера на клупскиот фудбал, рече претседателот на Светската фудбалска федерација (ФИФА), Џани Инфантино, обраќајќи се пред светските медиуми во Њујорк (САД), во пресрет на финалето синоќа помеѓу Челси и Пари сен Жермен. Инфантино додаде дека, иако тоа е европски натпревар, пет континенти беа претставени меѓу играчите на двата тима на стадионот „МетЛајф“, пишува Светската фудбалска федерација.
– Почна златната ера на глобалниот клупски фудбал… Дефинитивно можеме да кажеме дека ова Светско првенство за клубови беше огромен, огромен, огромен успех од сите различни гледни точки. Првпат слушнавме, пред некое време, дури и пред неколку месеци, пред неколку недели, „па, тоа никогаш нема да се случи“. Па, се случи и се случи успешно. Слушнавме, „никој нема да дојде на натпреварите“ и имавме, со финалето, речиси два и пол милиони гледачи на стадионите. Тоа се околу 40.000 по натпревар. Нема лига во светот, освен Премиер-лигата во Англија, која има просечно 40.000 гледачи. Слушнавме, „никој нема да го емитува ова“. Па, склучивме уникатен револуционерен договор со ДАЗН, дозволувајќи бесплатен пренос на секоја секунда од секој натпревар во секој агол од светот. Исто така, слушнавме дека финансиски нема да функционира, ќе биде неуспех, „никој не е заинтересиран“. Па, можам да кажам дека генериравме над две милијарди долари, речиси 2,1 милијарди долари приходи. Со ова натпреварување, за 63 натпревари, тоа е просек од 33 милиони долари по натпревар. Денес нема друго клупско натпреварување во светот што се приближува до вредност од 33 милиони долари по натпревар. Значи, ова е веќе најуспешното клупско натпреварување во светот, од сите различни мерења – рече Инфантино, пренесе Светската фудбалска федерација.
Фудбалери од 72 земји учествуваа на турнирот, со 39 националности меѓу стрелците на головите, а 16 земји беа претставени во финалето.
– Она што за мене, како претседател на Светската фудбалска федерација, е гордост и радост, е што во овие два тима, кои се два големи европски тима, всушност, има играчи од пет различни континенти. Имаме Азијци, имаме Африканци, имаме Јужноамериканци, имаме Северноамериканци и, секако, имаме Европејци. И ова е извор на огромна гордост, не само за ФИФА, секако, туку за фудбалот, за овие земји, за овие континенти што се присутни на најголемиот настан – рече претседателот на Светската фудбалска федерација.
Инфантино ѝ се заблагодари на целата фудбалска заедница, вклучувајќи ги шесте конфедерации „кои веруваа во овој проект“, Европската клупска асоцијација (ECA), клубовите учесници, играчите, тренерите, службените лица и гледачите.
– Мислам дека ова е моментот да им се каже „благодарам“ на сите, затоа што заедно создадовме нешто ново, нешто што ќе остане, нешто што го менува пејзажот на клупскиот фудбал и нешто што става толку многу клубови и толку многу навивачи од целиот свет на глобалната мапа. Фудбалот е глобален спорт. Тоа е најпопуларниот спорт во светот, го знаеме тоа. Сега можеме да го докажеме тоа, не само со Светското првенство, кое ќе се одржи следната година тука во САД, во Канада и во Мексико, туку и со ова ново натпреварување со Светското првенство за клубови, кое навистина ги зближува тимовите, играчите и навивачите од целиот свет. Навивачите од целиот свет беа апсолутно фантастични; имавме полни стадиони, имавме и стадиони што беа, се разбира, помалку полни, но сѐ се случи во радосна атмосфера. Немавме ниту еден инцидент – рече Инфантино.
Тимови од сите делови на светот беа конкурентни.
– Тимови од шест различни континенти освоија барем еден бод во ова натпреварување. Тимови од сите континенти постигнаа барем еден гол. Тимови од Мексико, од САД, од Саудиска Арабија поминаа во следната рунда. Видовме како Америка ги прифати сите различни заедници од целиот свет – изјави Инфантино, пренесе Светската фудбалска федерација.
Тој нагласи дека тоа им овозможило на играчите од секој агол на светот да се појават на глобалната сцена, како што се претставниците на Океанија, Окленд Сити.
– Окленд Сити, во одреден степен, исто така, претставува, 99,9 отсто од фудбалерите и фудбалските навивачи, сите ние што би сакале да бидеме како нив и кои никогаш нема да имаат шанса и потоа, одеднаш, еден од нас, или неколкумина од нас, можеа да играат против овие момци и ова мора да биде место за сите – рече тој. Н.М.
