Американската потпретседателка Камала Харис собори рекорди во собирање средства за нејзината кампања да биде кандидат на Демократската партија на претседателските избори во ноември, откако претседателот Џозеф Бајден во неделата се повлече од реизборната трка.
Тимот на Камала Харис собра повеќе од 81 милион долари за само 24 часа откако Бајден ја објави својата одлука, изјави синоќа портпаролот на кампањата Кевин Муњоз. Тоа е најголемата сума собрана за 24 часа и кај демократите и кај републиканците.
Кампањата на Камала Харис објави дека тоа е и најголемата сума што една американска изборна кампања ја собрала за еден ден во историјата на САД.
Харис изјави дека обезбедила поддршка од мнозинството делегати на Националната демократска конвенција да стане кандидат на Демократската партија за претстојните претседателски избори.
-Горда сум што ја обезбедив потребната поддршка за да станам кандидат на нашата партија и како „ќерка на Калифорнија“, горда сум што делегацијата на мојата матична држава помогна да ја достигнеме нашата кампања на својот врв. Со нетрпение очекувам дека наскоро официјално ќе биде прифатена номинацијата – рече таа, пренесува Си-ен-ен.
