Американскиот милијардер Илон Маск објави дека денес неговата стартап компанија за вештачка интелигенција (AI) „xAI“ ќе го претстави својот прв модел на вештачка интелигенција на „одбрана група луѓе“.
Стартапот со вештачка интелигенција, кој Маск го најави во јули, има за цел да ја „разбере вистинската природа на универзумот“, се наведува на веб-страницата на компанијата, а пренесе „Форбс“.
Тимот на „xAI“ од 12 членови, предводен од Маск, се состои од врвни истражувачи регрутирани од лаборатории за вештачка интелигенција од висок профил, како што се Google DeepMind, OpenAI и Microsoft.
Маск сака да изгради компанија која ќе се натпреварува со лидерите во индустријата како што се DeepMind и OpenAI со создавање алтернатива на ChatGPT.
Американскиот претприемач долго време се интересира за вештачката интелигенција и со години отворено зборува за потребата од справување со ризиците кои ги претставува новата технологија.
Тој беше ко-основач на OpenAI, креаторот на ChatGPT, кога стартапот започна во 2015 година, тврдејќи дека тој е причината поради која компанијата постои денес.
Маск се повлече од компанијата во 2018 година, наводно по неуспешниот обид за преземање и јавно ја критикуваше за приоритет на профитот пред безбедноста.
Тој е еден од лидерите во областа на високата технологија кои повикуваат на претпазливост во врска со потенцијалните ризици што вештачката интелигенција ги претставува за човештвото.
Според Форбс, Маск сака да развие вештачка општа интелигенција (AGI), форма на интелигенција која опишува вид на широки капацитети за учење и работа што ги имаат луѓето, наместо поограничените видови на интелигенција со специфични задачи, како што е шахот или алгоритам за препознавање лице.
За време на дводневната конференција за ризиците од вештачката интелигенција, која се одржа во ОК оваа недела, Маск рече дека вештачката интелигенција ќе биде „најразорната сила во историјата“, иако заклучи дека на крајот „ќе биде сила во позитивна смисла“.
