Со поместување на стрелките на часовникот за еден час наназад, завршува летното сметање на времето и започнува зимското сметање на времето. Поместувањето на часовникот има негативно влијание врз здравјето на населението, а можете да останете позитивни со користење одредени навики.
Летното сметање на времето е создадено за да им даде на луѓето дополнителен час дневна светлина, но реалноста е дека како што се приближува зимата и порано се стемнува, многу луѓе го започнуваат и завршуваат работниот ден во темница, со мала можност да поминуваат време на сончева светлина. Токму тој вид на промена може да направи некои луѓе да се чувствуваат депресивно.
Експертите објаснуваат дека сезонското афективно растројство е вид депресија што доаѓа и заминува со промената на годишните времиња. Во првите неколку дена бидете повнимателни од вообичаено и преземете превентивни мерки. Во деновите по поместувањето на часовникот треба да избегнувате работи што прават да се чувствувате непријатно и нервозно. Бавното темпо многу ќе ви помогне да се приспособите. За среќа, добрата вест е дека постојат некои работи што можете да ги направите за да останете позитивни во текот на зимските месеци.
Еден од првите совети е да излегувате надвор секој ден, барем на неколку минути. Многу луѓе, особено оние што работат оддома, се чувствуваат како врзани со синџири за својата работна маса. Меѓутоа, само неколку минути менување на сценариото може да значат целосна промена на расположението. Подолгата прошетка во природа во деновите од викендот исто така може да биде многу корисна.
Менувањето на часовникот може да влијае на деноноќниот ритам на телото, кој го регулира сонот, а недоволното спиење значително влијае на расположението, што ги отежнува концентрирањето и продуктивноста. За да го подобрите сонот, психолозите пред сè препорачуваат да избегнувате стимуланси како кафе, алкохол и мобилни телефони пред спиење. Најдобро е да го намалите количеството на кафе и цигари и да го збогатите менито со свежо овошје и зеленчук. Лесната храна богата со витамини и минерали ќе го разбуди телото и ќе му ги врати енергијата и природната рамнотежа.
Знајте дека на возрасен човек му се потребни меѓу седум и осум часа сон во текот на ноќта, затоа обидете се да го одредите најдоброто време за спиење, во зависност од тоа кога треба да станете наутро. Квалитетот на спиењето е еднакво важен. Пред спиење, исклучете ја целата електроника во спалната соба што може да го наруши сонот и проверете дали просторијата е проветрена и затемнета за да можете полесно да заспиете и да се разбудите наутро одморено и подготвено да го започнете денот.
Исто така, докажано е дека медитацијата им помага на луѓето да се релаксираат и да им пристапат на животните предизвици со попозитивен начин на размислување. Редовната медитација може да им помогне на некои луѓе подобро да се справат со своите грижи и анксиозност.
