Енергетскиот пазар сѐ уште исклучително нестабилен на импакт-факторот наречен „нарушување на снабдувањето“
Цените на европскиот природен гас се во срамежлив пад откако во средата неочекувано се зголемија дури за 40 отсто. Фјучерсите за гас TTФ се намалуваат за 5,8 отсто, односно вчера изнесуваа 37,45 евра за мегават-час. Остриот скок, па потоа мал пад, само нагласува колку пазарот останува нестабилен на факторот наречен „нарушување на снабдувањето“! Имено, холандските предмесечни фјучерси, репер за гас во Европа, паднаа за 3,74 отсто, до 38,34 евра за мегават-час во Амстердам, додека во Велика Британија тие паднаа за 4 отсто, анулирајќи ја претходната добивка.
Меѓутоа, за издвојување е фактот што цените, и покрај нестабилноста, остануваат драстично пониски споредбено со минатата зима. Но, добивките во средата само го означија највисокото ниво во последните два месеца. Исто така, факт е дека европските складишта за гас во моментов се со исполнетост многу над просечните нивоа. Енергетските експерти предвидуваат дека ќе бидат блиску до целосна исполнетост пред почетокот на зимата.
Фактори за екстремната нестабилност на европскиот пазар на гас изминативе месеци
Корекцијата на цените е најновиот пример за екстремна нестабилност што го следи европскиот пазар на гас со месеци. Резервите сега се полни околу 88 отсто во просек – многу над нормалното за период од годината, но секој знак за нарушување на понудата може да доведе до скокови на цените. Изразитите амплитуди може да бидат уште повисоки во пресрет на зимата. Позиционирањето на трговците исто така придонесува за промени во цените. Трговците ги следат резервите на гас во Азија, каде што изгледа дека сликата е измешана. Вкупните резерви на ЛНГ во Јапонија можеби паднале под минатогодишното ниво поради посилната побарувачка на енергија. Во Кина, резервите на резервоари за ЛНГ на увозните терминали може да достигнат 90 отсто во наредниот месец, што би можело да ги принуди увозниците да ги повлечат испораките на морските пратки.
Понатаму, потенцијалните штрајкови во три големи капацитети за ЛНГ во Австралија би можеле да нарушат околу 10 отсто од глобалниот извоз на гориво. Доколку продолжи индустриската акција, тоа би можело да ги натера азиските купувачи да бараат алтернативни набавки надвор од регионот, интензивирајќи ја конкуренцијата со Европа за горивото. Пазарот внимателно ги следи тековните разговори меѓу работничките синдикати, „Шеврон“ и „Вудсајд енерџи“. Штрајковите би можеле да започнат веднаш следната недела според работните правила.
Според аналитичарот на „Блумберг“ Патрисио Алварез, европскиот увоз на ЛНГ веќе се намали од највисоките нивоа забележани претходно оваа година, а конкуренцијата за понуда ќе се зголеми кога ќе започне побарувачката за греење. Европа се потпира на горивото за да ги пополни празнините оставени од загубата на рускиот гасовод, но тоа веројатно нема да биде доволно пред 2025 година. Р.Е.
