Вежбањето на екстремни температури може да биде опасно, па затоа е клучно да се изберат вежби што се безбедни за изведување на жештина, кои најчесто вклучуваат активности во затворени и климатизирани простории или оние во вода или море. Една од придобивките од вежбањето на потопло време е тоа што нашите тела се генерално пофлексибилни кога ни е топло.
Меѓутоа, дефинитивно ви треба план за хидратација пред да вежбате. Фитнес-тренерот Ен Малум предупредува дека е клучно да се остане правилно хидриран пред, за време и по тренинг.
– Препорачливо е често да пиете мали голтки вода наместо да пиете големи количества одеднаш. Соодветната хидратација помага да се одржи регулацијата на телесната температура, ја поддржува работата на кардиоваскуларниот систем и спречува дехидрација – советува Малум.
Бидејќи на телото му е потребно време да се приспособи на вежбањето на топлина, Малум додава дека е важно да ги слушате предупредувачките знаци на вашето тело, како што се вртоглавица, гадење или недостиг од пот. Доколку се појави некој од овие симптоми, важно е да се одморите, да побарате сенка и да се оладите. Издвојуваме неколку примери на вежби за спортски активности што ќе ве мотивираат, па дури и ќе ви помогнат да се разладите кога надвор е навистина топло.
Јога
– Јогата во жешка средина нуди многу придобивки, вклучувајќи и подобрена флексибилност и ментална сила. Топлината помага да се релаксираат мускулите и го олеснува фокусирањето на умот – објаснува Малум.
Пливање
Пливањето не само што е освежувачко и природна форма на разладување во жешкиот летен ден, туку е и ефикасна кардиоваскуларна активност со мал ефект што помага да се изградат сила и издржливост. Друга опција е аеробик во вода, уште една кардиовежба што исто така ги зголемува силата и флексибилноста и е совршена активност за трудници, постари лица и оние со проблеми со зглобовите или мускулите.
Стоечко веслање на штица
Секој што некогаш пробал стоечко веслање на штица знае дека е многу потешко отколку што изгледа. Одржувањето рамнотежа на голема пловечка штица бара употреба на целото тело, со силен акцент на стабилноста и контролата. Секако, и веслањето е одлична вежба за рацете. Тоа е одлична вежба во вода во топлите денови.
Вежбалница
Повеќето вежбалници се речиси празни во текот на летните месеци, а помалку луѓе што вежбаат значи помалку тела што зрачат топлина, што ја прави вежбалницата совршено место за вежбање кога надвор е топло. Се разбира, обично има и клима-уред, па искористете го вашето време таму паметно и планирајте да ги правите најинтензивните вежби, како кревање тегови, во разладена вежбалница наместо на отворено.
Веслање
Веслањето е уште еден воден спорт што ќе ви го раздвижи целото тело. Не само што ги зајакнува вашите раце, нозе и тело, туку е уште еден одличен пример за кардиоактивности со мало оптоварување, што значи дека е полесно за вашите зглобови отколку трчањето. Плус, секогаш можете да скокнете во водата за да се оладите.
Вежби за мобилност и истегнување
Вежбите за мобилност и истегнување, како што се динамично истегнување или вежби за насочена подвижност, исто така можат да бидат корисни на топлина.
-Покачената температура овозможува зголемена флексибилност и еластичност на мускулите, олеснувајќи го поголемиот опсег на движења за време на вежбањето. Изведувањето вежби за мобилност и истегнување во топла средина може да спречи мускулна нерамнотежа, да го подобри држењето на телото и да го подобри севкупниот квалитет на движењето – вели Малум.
