Во рамките на годинашното издание на фестивалот „Златна рамка“, љубителите на филмот ќе имаат можност да ги погледнат долгометражните остварувања „Снежана на крајот умира“ во режија на Кристијан Ристески, „Мими“ на Даријан Пејовски и „Најсреќниот човек на светот“ во режија на Теона Стругар Митевска, како и документарните филмови „How do you define arrogance“ во режиран од Небојша Илијевски, „Фениксот од Кавадарци – Васил Хаџиманов“ во режија на Мишо Нетков и „Звукот на тишината“ на Анастасија Лазарова. Краткометражната програма ќе се одвива во киното „Фросина“, во рамките на која, в петок, на 21 април ќе бидат прикажани „Тале и Корона“ во режија на Томислав Алексов, „Само ѓаволот се плаши од вода“ на Лидија Мојсовска и „Обичната Ели“ режиран од Лавинија Софрониевска. На 22 април (сабота) ќе бидат прикажани „Синиот час“ во режија на Ана Јакимска, „Си беше еднаш еден звук“ на Огнен Шапковски, „Бесценета“ режиран од Дејан Јованов и „Соло Мод“ во режија на Тамара Котевска, како дел од петтото издание на „Златна рамка 2023“.
Со проширена програма, бесплатни проекции и трибини под наслов „Во наш филм“ од 20 до 22 април ќе се одржи „Златна рамка“ во организација на ДФРМ во Кинотеката на Македонија и киното „Фросина“ во Младинскиот културен центар.
– Филмската манифестација „Златна рамка“ веќе пет години претставува можност за публиката бесплатно да ги погледне сите македонски филмски остварувања што биле реализирани во текот на изминатата година, а кои се финансирани од буџетот на државата и поддржани од Агенцијата за филм. Оваа година е планирано манифестацијата да понуди вкупно 13 филмски остварувања од минатогодишната продукција, од кои три долгометражни филмови, три документарни и седум краткометражни филмови – велат организаторите.
Според претседателот на Друштвото на филмски работници, Игор Иванов-Изи, петтото издание на „Златна рамка“ го става акцентот на успехот на домашната кинематографија во текот на изминатата година.
Уметничката координаторка на „Златна рамка“, Ана Василевска, ја потенцираше важноста на манифестацијата за публиката, која е желна за дела од домашната филмска продукција.
– „Златна рамка“ се создаде поради фактот што најголем број од домашните филмови не се прикажуваат на редовен репертоар во киносалите и ова е одлична можност да се претстават пред нашата публика. Ваквиот начин на ревијално претставување на националната кинематографија се практикува насекаде во светот и е дел од поддршката и едукацијата на домашната публика за сопствената кинематографија. Исто така, публиката ќе има можност да ги проследи филмовите заедно со дел од авторите што ги креирале и да учествува во дискусиите што се предвидени по секоја проекција – истакна Василевска.
Генералниот секретар на ДФРМ, Томи Салковски, посочи дека како и минатата година, „Златна рамка“ ќе продолжи со спроведување на социјалната програма „Фокус“, наменета за публиката што од најразлични социјални ограничувања не може да ги посети киносалите.
– Водени од мотото „Ако вие сте спречени да дојдете на филм, ние филмот ќе го донесеме кај вас“, и оваа година на „Златна рамка“ ќе бидат организирани проекции во рамките на установи и институции каде што живеат или престојуваат лица што не можат да одат во кино, ниту да посетат филмски фестивал или друг вид настан. Ова подразбира дека граѓаните во казнено-поправните домови, домовите за стари лица, болниците, засолништата за згрижување, центрите за зависност и низата други институции од ваков вид ќе имаат можност да присуствуваат на филмска проекција, која професионално ќе биде организирана и реализирана во просториите на самите институции – вели Салковски.
С.Ј.
