Судењето за убиството на хрватскиот ракометар Денис Тот продолжува на 9 ноември
Судењето за убиството на хрватскиот ракометар Денис Тот, кој беше претепан до смрт пред дискотека во Градскиот парк во Скопје, продолжува на 9 ноември, откако денеска од страна на одбраната беа изведени докази во Основниот Кривичен суд Скопје.
На судењето беа повикани вешто лице психијатар, д-р Зора Митиќ, и специјалистката по психологија, д-р Соња Ефтимова, кои ја анализираа психолошката состојба на Анџело Ѓоргиевски, еден од обвинетите во процесот.
Митиќ посочи дека Анџело имал лузни на десната рака, истата со која му го задава првиот удар на Тот. Според неа, мускулатурата на овој екстремитет му е слаб, што би значело и дека ударот бил слаб.
На судењето сведочеше и Сања Ефтимовска – специјалист по медицинска психологија. Таа го опишуваше Ѓоргиевски како лице кое е пасивно во стресни ситуации.
– Се работи за личност со здраво разумско логично размислување со сочуван тест на реалноста и способност за компензирано однесување. Во стресни ситуации и фрустрациони, луѓето различно реагираат, се виде дека Анџело е склон кон пасивизација, пие и лекови, доминираат симптоми од невротски тип состојба во која некој се повлекува, некој напаѓа, тој е од тие типови кои пасивизираат – изјави Соња Ефтимова.
Повиканите сведоци за кои беше предвидено да присуствуваат на денешното рочиште, не беа присутни.
Основното јавно обвинителство Скопје ги гони обвинетите Анџело Ѓоргиевски, Клементина Левковска и Андреј Костовски за кривично дело „убиство“ од член 123 став 1 во врска со член 22 од Кривичниот законик. Согласно обвинителниот акт, обвинетите се товарат дека на 7 април, пред ноќен клуб во Градскиот парк во Скопје, заеднички го лишиле од живот оштетениот Денис Тот.
Процесот го води судијката Елена Илиевска Јосифовиќ, а застапник на обвинението е обвинителката Тања Трајчевска.
