Во книгата пред сѐ сакам да ги поттикнам децата на хуман однос кон животните, особено кон оние во зоолошките градини. Повеќето од нив немаат домашни миленичиња и посетувајќи ги животните во зооградините стекнуваат свои четириножни пријатели, вели Киро Донев
„Дарко во зоопаркот“ е насловена новата книга за деца на познатиот македонски писател Киро Донев. Оваа е деветто дело од овој автор објавено од издателството „Македоника литера“.
Книгата е поделена во два дела, во првиот – „Дарко во зоопаркот“ се објавени триесетина текста, во кои се претставени исто толку животни, преку разговори што со нив ги води главниот лик – младиот новинар Дарко. Всушност, најпопуларните животни за децата се претставени низ дијалози и на овој начин Киро Донев ги истакнува хуманите односи меѓу човекот и животните.
Најмладите читатели ќе дознаат интересни податоци за: неговото величество лавот, кумчо волчо, мечокот Марко, едногрбиот пустински брод, господинот Кљак-Кљак, слонот Тоби…
Интервјуата на Дарко се едукативни, искрени лични искажувања, своевидни лични карти на животните.
– Во книгата пред сѐ сакам да ги поттикнам децата на хуман однос кон животните, особено кон оние во зоолошките градини, затоа што тие се одделени од нивната природна средина. Од друга страна, добро е што во денешните зооградини условите секојдневно се подобруваат, па на сите животни во нив, од најмали до најголеми, и на птиците и влечугите им е овозможено да не се чувствуваат како да се во затвор. Исто така, благодарение на зоопарковите, на многу животни што се пред истребување им е овозможено да го продолжат својот вид, како што е случај со пандите, белиот тигар, белата мечка… Во нивните живеалишта тие може да опстанат, да продолжат да се размножуваат – објаснува авторот Киро Донев.
Тој го избрал Дарко како главен лик што испраќа едукативни пораки до децата, зашто тие се најчести посетители на зоолошките градини, заедно со нивните родители. Според него, честопати овие мали љубопитни посетители не ги почитуваат непишаните правила: да не се хранат животните со штетни работи, да не се повредуваат, да не се оштетуваат објектите во кои живеат…
– Основно е она што го учат децата на часовите да го дознаат на поблизок начин, а наедно да го запознаат менталитетот на секое животно. Да научат од каде потекнува, како се размножува, што сака, што не сака и други малку познати податоци и факти. Освен тоа, многу деца немаат миленичиња и посетувајќи ги животните во зооградините стекнуваат свои четириножни пријатели – ни рече Киро Донев, кој и самиот е добар познавач и љубител на природата и, секако, на животните.
Тој дополни дека вториот дел на книгата е насловен „Приказни за годишните времиња“. Објавени се триесетина текста што се однесуваат на четирите годишни времиња, но во сите нив основна тема повторно се животните и природата.
– Вториот дел на книгата е сочинет од приказни за годишните времиња, кои се 4 мини-циклуси, во кои за секое годишно време децата читатели треба да знаат што се случува во природата и во нивната блиска животна околина. Тоа, исто така е дополнување на знаењето што тие го стекнуваат на училиште. Сакам да напоменам дека овој дел од книгата е објавен во Бугарија и е влезен во нивната задолжителна лектира од прво до четврто одделение, а книгата е преведена и издадена и во Украина. Исто така како посебна книга во овие земји е издадена и „Дарко во зоопаркот“, но со наслов „Весел зоопарк“ – вели тој.
ПРОМОЦИИ
Денеска во Штип
Денеска, во 12.30 часот, во градската библиотека „Гоце Делчев“ во Штип, ќе биде промовирана едицијата во десет книги „Најдобрата кинеска литература за деца“, која на македонски јазик ја објави „Македоника литера“. Едицијата ќе ја претстави проф. д-р Јованка Денкова.
Антологиската е реализирана како копродукциски проект со издавачката куќа „Делфин букс“ од Пекинг, НР Кина. Во неа се застапени најпознатите и најчитани современи кинески писатели за деца и за млади. Во овие книги се вклучени најдобрите дела на авторите, избрани од самите нив. Изборите содржат бајки, басни, раскази или новели. Како прилог, во книгите се објавени и текстови на авторите што го образложуваат својот избор и се осврнуваат на своето творештво.
Едицијата ги содржи следните избори: „Тајната на слатките јагоди“ од Танг Сулан, „Мирисливата птица“ од Ѓин Бо, „Легенда за мечето Панда“ од Сун Јоуѓун, „Магичниот папагал“ од Ге Бинг, „Персискиот мачор Пек“ од Гао Хонгбо, „Малиот ној рицар“ од Лиу Сианпинг, „Божјиот фенер на морето“ од Донг Хонгјоу, „Приказни големи колку дланка“ од Џанг Ќуишенг, „Братучед ми доаѓа“ од Ќин Венѓун и „Вкусот на сонцето“ од Џанг Џилу.
Утре во Струмица
Утре точно напладне во НУЦК „Антон Панов“ во Струмица ќе се одржи промотивно пладне на литература за деца. Ќе бидат промовирани едицијата во десет книги „Најдобрата кинеска литература за деца“ и најновата прозна книга на Киро Донев – „Дарко во зоопаркот“. Во претставувањето на книгите, изданија на „Македоника литера“, ќе учествуваат: Ацо Гогов, Ана Витанова-Рингачева, Киро Донев и Нове Цветаноски. Делови од книгата ќе прочита актерката Јулија Милкова.
