Џон Стјуарт, американски комичар и поранешен водител на сатиричната емисија „Thе Daily Show“, одржа говор во Конгресот на САД на тема финансиска помош и надомест за болните пожарникари и припадниците на други служби за итни случаи, кои учествуваа во спасувањето по терористичките напади на кулите близначки на 11 септември, 2001 година.
-Треба да се засрамите- рече Стјуарт, без двоумење пред конгресмените, видно вознемирен од фактот дека многу конгресмени не се појавија на заседавањето на комисијата на Претставничкиот дом (долниот дом на Конгресот) за осигурување на средства за Фондацијата за надомест на жртвите од 11 септември (VCF) .
Како што објави „CBS News“, Фондацијата која беше основана пред девет години за покривање на медицински трошоци за пожарникарите, полицајците, припадниците на брзата помош и други сектори кои учествуваа во спасувањето, нема пари.
Голем број на спасувачи се погодени од тешки болести како рак или хронични белодробни заболувања поради вдишување на токсична прашина од урнатините на кулите-близначки, откако членови на Ал-Каеда ги урнаа забивајќи се со авиони во нив.
Стјуарт фактот дека скоро половина од членовите на комисијата не дојдоа на расправата го опиша „срам за државата“ и „дамка за институцијата“.
-Додека седам тука, мислам на тоа како целата оваа просторија е метафора за тоа што се случува со целиот процес на обезбедување на здравствена заштита и надомест за спасувачите од 11 септември. Зад мене, полна просторија со спасувачи, а пред мене речиси празен Конгрес. Тешко болни дојдоа тука да разговаат, очигледно со никого. Треба да се засрамите од оние кои не се тука, но знам дека нема. Знам, зошто во оваа сала нема чувство за одговорност- рече Стјуарт.
Стјуарт го повика Конгресот да обезбеди средства за VCF во наредните 70 години, за болните да не стравуваат дали нивните трошоци за третман ќе бидат покриени.
