Кога ќе се одлучите за некоја диета што бара калориски дефицит или намалено внесување храна, важно е да најдете начини да останете сити. Советите што ќе ги прочитате подолу не бараат многу жртви во исхраната. Со овие совети нема да се чувствувате гладни или екстремно уморни, додека ги исполнувате сите ваши потреби за храна. Нема да мора да јадете само салати или да се откажете од слатки.
Првиот совет е да го зголемите обемот на храната. Колку е поголем обемот на нискокалорична храна, толку е поголема ситоста по јадење. Зеленчукот е најдобриот начин да се зголеми обемот на храната без да се внесуваат многу калории. Се препорачуваат зелена салата, домат, краставица, кисела зелка, карфиол, брокула и пиперка. Од житните растенија се препорачуваат просо, булгур, кускус и овес, а од мешунките наут, грав, леќа, боранија и грашок.
Друг совет е да го намалите количеството висококалорична храна. Наместо два реда, изедете од две до три коцки чоколадо или ако консумирате путер од кикиритки, користете една мала лажица наместо голема. Можете исто така да најдете некои поздрави верзии на слатки со помалку калории.
Третиот совет се однесува на правилната пропорција на одредени видови храна во чинијата. Така, кога послужувате храна, ставете повеќе зеленчук во однос на храната богата со јаглехидрати. Една четвртина од чинијата нека биде исполнета со јаглехидрати, другата четвртина со протеини, а остатокот дополнете го со зеленчук.
Четвртиот совет е да направите супи и чорби. Тие имаат голем волумен поради големото количество вода, па се одличен начин за внесување малку калории. Покрај тоа, ќе го намалите внесувањето леб, а ќе го зголемите внесувањето зеленчук во вашата исхрана.
Петтиот совет се однесува на внесувањето протеини. Протеините се важни за растот и развојот на мускулната маса, а создаваат и поголемо чувство на ситост. Освен месото и рибата како осличот и бакаларот, најдобри извори на протеини се јајцата и свежите сирења.
